Pietatis et misericordie dinoscitur esse inditium manifestum, cum per elemosinam a peccatis absoluuntur anime defunctorum. Ea propter nos Hainricus de Inna miseratione diuina Canonicus et Vicedominus ecclesie Patauiensis et decanus in chrems Tenore presentium profitemur et notum fieri cupimus presentium inspectoribus vniuersis, quod Quindecim librarum redditus denariorum Wiennensis monete in Guntharstorf et quatuor librarum redditus in Teuffental, quos (sic) nostra pecunia conparauimus, beate Marie virgini et ecclesie in Wilhering tradidimus taliter ordinando, vt de quinque librarum redditibus duodecim pauperes in hospitali eiusdem ecclesie a septuagesima vsque ad octauas Pasche semel tantum in die pulmentis subscriptis nostro nomine reficere habeat abbas ecclesie memorate Ita, quod in quadragesima haheant quatuor fercula, videlicet olus, ordeum, pisam et glicerum et pro duobus pauperibus vnum allec, Extra quadragesimam vero tria fercula eiusdem generis lacte uel caseo condita. et duos panes hospitum et pycarium cereuisie pro quolibet et in die cene domini quinque vlnas panni grisei pro tunica tribuatur cuilibet eorundem; ad quod plenius et liberius exequendum ordinanimus eidem abbati et ecclesie sue post mortem nostram de predictis redditibus duas liberas, de quibus cuilibet pauperum predictorum sunt duo calcei post nostrum obitum erogandi, in vita uero nostra, si ipsos calceos dare poterit ipse abbas, sue conscientie duximus corimittendum et sic deputate sunt ad predictam elemosinam pauperum VII. libre Ita, vt, quitquid de eisdem super expensas eorundem ipsi remanserit, teneatur aliis pauperibus elargiri. Insuper ordinauimus alias duas libras reddituum, vnam pro consolatione conuentus et alteram in subsidium abbacie, vt de eisdem tam in vita nostra quam post mortem proxima feria secunda post dominicam, qua cantatur quasimodo geniti, noster anniuersarius dies et fratris nostri Wernhardi Et in vigilia beati Mathie apostoli patris nostri Wernhardi de Inna et matris nostre alhaidis Et in vigilia beate Prisee virginis fratris nostri Engelschalci et sororum nostrarum Brigide et Gertrudis secundum consuetudinem ordinis peragatur. Hoc et iam sane memorie conmendamus, vt, si ipse dominus abbas vel aliquis successorum suorum negligens extiterit in ipsis elemosinis et omnibus antedictis, extunc ad soluendum integraliter predictas VII. libras eodem anno ecclesie in Fu^erstencello erit iuxta tenorem sui priuilegii obligatus. Ceterum quod de aliis decem librarum redditibus, qui nobis remanent, sit ordinandum in alio instrumento, quod ipse dominus abbas a nobis habere dinoscitur, plenius est expressum. Vt igitur rata permaneant omnia supradicta, presentes litteras dedimus sigilli nostri munimine roboratas in euidens testimonium et cautelam cum testibus subnotatis qui sunt hii: dominus Hvgo venerabilis abbas de Fůrstencelle, frater Marquardus ibidem, frater Chunradus Cellerarius, frater Vlricus Supprior, frater Otto custos confratres ecclesie antedicte, Fridericus notarius, Heinricus de ahleiten, Wernhardus de vreihaim, Heinricus et Chunradus famuli nostri et alii quam plurimi fide digni. Actum et datum in Wilhering Anno domini M.CC. nonagesimo tertio kalendis Martii.

Source Fulltext: OÖUB 4 (Wien 1867) S. 181-183, Nr. 198