Charter: Urkunden (827-1854) 1293 XII 20
Signature: 1293 XII 20
Add bookmark
Edit charter (old editor)
20. Dezember 1293, o. O.
Agnes von Tegernbach gibt Abt Chunrat von Wilhering einen Hof und eine Hube zu Hard und bekommt dafür einen Hof zu Waldern.Source Regest:
OÖUB 4 (Wien 1867) S. 197-198, Nr. 215
OÖUB 4 (Wien 1867) S. 197-198, Nr. 215
Current repository:
Stiftsarchiv Wilhering (www.stiftwilhering.at)
Stiftsarchiv Wilhering (www.stiftwilhering.at)
Die Siegel sind verloren gegangen.
Material: Pergament


Ich Agnes von Tegernbach tun chvnt allen den, di disen brif sehent oder horent, di nv sint vnd noch chvnftich werdent, daz ich mit gůtem willen vnd mit gantzer gunst meines aidems Hovgen von Morspach vnd miner chinde Chvnigunten, Dimuten vnd Perchten vnd mit miner Oechem von Bolnhaim vnd ander miner vrevnt rat dem erbern Abt Chvnraten vnd siner Sampnung ze Wilhering minen Hof vnd mein Hveb datz Hard, di Vlrich von Cumpolting ze sein aines leibe von mir ze lehen hat, mit rehter furciht mein selbs vnd mines aidems Hovgen von Morspach vnd aller miner chinde geben vnd verchauffet han also, daz daz vorgenant Chloster vnd die Sampnung von Wilhering, di got dinet, den vorgenanten Hof vnd di Hvb datz Hard mit alle dev vnd dar zv gehoert, ez sei an acher, an wisen, an holtz vnd swi ez genant ist, versueht vnd vnversueht, in rehter aigens gwer, als ich vnd min vordern ez her gehabt habent, ledichleichen vnd ewichlichen besitzen vnd haben suln an allen chrig vnd sol ich vnd mein aiden Hovch von Morspach vnd minev chint des vorgenanten Hofs vnd der Hveb datz Hard des vorgenanten Chlosters vnd der Sampnung ze Wilhering gewer sein nach lants reht gein allen den, di sev vmb den vorgenanten Hof vnd vmb di Hub datz Hard ansprechent, swa vnd swanne si sein bedurfen. So hat mir der vorgenant abt vnd die Sampnung von Wilhering vmb den vorschriben Hof vnd vmb di Hvb datz Hard ir Hof datz waldarn geben vnd als vil beraiter pfenning, daz si mir den Hof vnd di Hvb datz Hard habent gaentzlich vergolten, vnd sol ich den selben Hof datz waldern in rehten aigens gwer ledichlichen haben, als si in gehabt habent, an allen chrig vnd suln auch des selben Hofs datz waldarn mein gwer sein nach lants reht. Wer aber daz, daz imme (sic) ovf den vorgenanten Hof vnd auf di Hub datz Hard spraech vnd bezzers rehts iaech vnd daz behabt, der gib dem Chloster vnd der Sampnung von wilheriug hvndert March lotigs silbers, vuer di ich in den Hof vnd di Hvb datz Hard uersetzet vnd geantwrt han, vnd antwrt in wider ir hof datz waldarn ledichlichen, als si in vor gehabt haben; ze gelicher weis wer imme, der imme bezzers rehts iaech ovf den Hof datz waldarn vnd daz behabt, der geb mir hundert pfunt pfenning vnd cih sich zv dem Hof datz waldarn, vur die mir der vorgenant abt vnd die Sampnung von wilhering denselben Hof datz waldarn in mein gewalt geantwrt habent. Daz aber diser chauff vnd sein bestetigung stet vnd vnuerchert beleib, so gib ich dem vorgenanten Chloster vnd der Sampnung von wilhering ze vrchunde disen brif versigelt mit mines vater Insigel hern Wlfings von Tegennbach vnd meim Insigel vnd meins aidems Insigel Hovgen von Morspech vnt bestetigt mit den Cevgen, di hie geschriben sint. Daz sint her weichart, her Ortolf, her Heinrich, her philippe mein Oeheim von Bolnhaim, Heinrich von Schevnawe, Heinrich, Ott, Levpolt, Leupolt von Sluzzelberch vnd ander bider levt genvech. Ditz ist geschehen, do von Christes burd warent Tausent jar, zwei Hvndert jar vnd drev vnd Nevntzich jar vor weinahten an dem naechsten suntag.
Source Fulltext: OÖUB 4 (Wien 1867) S. 197-198, Nr. 215
Original dating clause: vor weinahten an dem naechsten suntag
Language:
Places
- o. O.
Wilhering, Stiftsarchiv, Urkunden (827-1854) 1293 XII 20, in: Monasterium.net, URL <https://www.monasterium.net/mom/AT-StiAW/Urkunden/1293_XII_20/charter>, accessed 2025-03-15+01:00
You are copying a text frominto your own collection. Please be aware that reusing it might infringe intellectural property rights, so please check individual licences and cite the source of your information when you publish your data
The Charter already exists in the choosen Collection
Please wait copying Charter, dialog will close at success