Ich Ott der elter vnd Ich Ott der Junger vetern von Trawn veriehen vnd tvn chvnt allen den, di disen brief sehent oder horent lesen, di nu sint vnd noch chvnftich werdent, Daz wir betrahten diser werlt vnstaetichait vnd des ebigen lebens saelichait vnd sein durch vnser sel hail mit verdahtem mvt vnd mit gutem willen aller vnser gerben gestanden ledichlichn von der aigenschaft des halben hofs ze winchel, den êmaln von vns hat gehabt ze rehtem lehen her Chvnrat der schriber vnd haben sei gegeben vnser vro°wen ze wilhering vnd den dinern, di got da dinent sint, in rehter aigens gwer ebichlichn ze haben vnd ze sitzen (sic) an allen chrig. wer aber daz, daz di vorgenanten herren ze wilhering iemant beswarn wolde vmb di vorgnanten aigenschaft oder dhains rehtz dar auf iehen wolde, des si wir ir gwern, swa vnd swenn si des bedv^erfen an all wider red. (Nun folgt der frei gelassene Raum für die unausgefertigte Urkunde.)

Source Fulltext: OÖUB 4 (Wien 1867) S. 371, Nr. 401