Wir Graff hainrich zu Schawnnberg bekennen offennlich mit dem brieff allen den, dj jn sehend oder ho^erend lesen, dy nun sind vnnd hernach khünfftig werdend, das wir mit guetleichem willen vnnser und aller vnnser Erben vnd auch mit wolbedachtem muet vnns veraint vnd beratten haben, das wir gemainclich vnnser frawen vnd den herren gemainclich desgotzhaws zu wilhering ab vnnser vordern sell, ab der vnnsern vnd auch ab aller vnnser nachkhünfftigen sell haben gegeben zu ainem Sellgera^ett freyung vnd fuerfart an vnnserer Mawt zu Aschach Also ganntzlich vnd ledigclich, das die selben herren zw wilhering alles das, das jr aigenhafft gu^et ist, wie es genanntt wird, vnd das sy zw pesserung jrer phruenndt wellenndt anlegen, Ewigclich sullen fuer vnnser vorgenanthe maut zw Aschach fueren ab vnd auff, wann sie wellenndt vnd als offt sy des bedurffennd jn dem jar an alle vordrung vnd an alle maut. wir wellen auch vnd gebieten allen vnnsern mawttern, die zu disen zeiten sind oder khünfftigclichen werdennd, das Sy das selbe vnnser sellgera^et dem Gotzhaws zw wilhering an chainerlay sachen ckrenngkenn, sunder si lassen alles jr guet furen, wo sew wellent, an allen phrangksall vnd an alle jrrung, vnd das die gab vnd die andacht als sta^ett vnd Ewig beleib, des geb wir dem Gotzhaws vnd den herren zw wilhering zw aim vrkunndt disen brieff versigelt mit vnnserm grossen anhanngunden jnnsigel, der brieff ist geben nach Christj gepurdt dreytzehennhundert jar an sannd Jacobs des heyligen zwelfpotten tag.

Source Fulltext: OÖUB 4 (Wien 1867) S. 347-348, Nr. 373