Ich pernhart der Nadernpech vnd uer Elzbet mein Hausurowe tun chunt allen den, di nu sint oder nach vns chunftich werdent, daz wier mit vnserm gutlichem willen alles vnser aigen datz Oberndorf, daz pei der Scharten leit vnd auch vnser Hausurowen morgengab gewesen ist von vns, daz hab wier geben zechouffen mit allem reht, als wir iz haben gehabt ze holz vnd ze ueld, versůcht vnd vnuersůcht Hern vlreichen dem Pruschinchen vnd Hern Růgern seim pru^eder vnd tůn vns des selben aigens ze Oberndorf uu^erzieht mit gu^etlichem willen also, daz wier noch dehain vnser Erben nach dem forgnanten aigen datz Oberndorf dehain ansprach nimmer mer schullen gewinnen vnd des uůrgenanten aigens an allen steten ir gwer sein ze allem reht. wer daz dar uber, daz iemand chem, der daz selbe aigen datz Oberndorf ansprech, des die uuorgenanten Hern Her vlreich vnd Her Růger schadhaft mochten werden, da uu^er tůe wir jn pizaig vnd sezzen in zebentiwer alles vnser aigen ze Hezelsperg vnd alles, daz wier in Oesterreich habn; nemen sie des dehain schaden, den schullen si auf dem aigen haben, als hie benent ist. wier uergehen auch, daz die prvschinchen ditz Aigen ze aim Selgret gebent hinz wilheringe vnd pinten wier vns hinz wilheringe dem Abt vnd der Samnunge aller der gelubd, die wier Hern vlreichen vnd Hern Rugern paiden prvschinchen gelobt haben über daz uuor gnant Aigen datz Oberndorf. Daz diu red ganz Stet vnd vnuerchert belibe, Dar uber geb wier zeim vrchu^end disen Prief bestet mit vnserm inSigel vnd der stat inSigel uon Neumburch. Der red ist gezeuch her Stephan von meissauw, Her ChunRat uon Hauspach vnd her Gotfrid sein průder, Her wlfinch uon Puechperch, wernhart der messenpech, Her Leupold der Span uon dem wasen vnd sein průder der Spendel, Her vlreich der Richter, Sibenhosen sun, her Ortwein vnd her ChunRat aus der Schefstras, Leupold uon Neunburch, Marquart der Oeppler, Chunrad uon Eysauw vnd vlreich der pais uon Linz, Vlreich der Schreiber uon Stainpach, HainRich vnd wernhart, sein průder, ChunRat uon grůeb, Magens vnd Reichart von Rentenperg, wernhart uon Linthaim, fridel der Chamrer vnd ander leut genůg. Der prief ist geben, do uon Christes gep\erd sint Gewesen tausent iar vnd Dreuhundert iar an sand Marteinstag ze Grezenstain.

Source Fulltext: OÖUB 4 (Wien 1867) S. 354-355, Nr. 380