Ich Fridrich der Swantz vergich an diesem brief allen den, di in sehent oder lesent, daz ich mit bruder Chvnraten von wilheringe, der hofmaister vnder den weinzurln ist, ze shaffen han gehabt vnd ouch er mit mier vmbe gult, di wir paide en ander gelten solten.vnd haben ouch wier vns paidenthalben verslichtet vnd ver richtet, er mich vnd sich in alles, des wir gegen en ein ander vnd mit ein ander ze shaffen heten also, daz er mich gewert hat recht vnd redlich vnd ich han in gewert an als vil, daz ich im di weil ich sein holde pin, seinen dinst jerichlich geben sol, als ich ouf dem aigen, daz ich von dem Gotshaus han, funden han. vnd darvber gib ich im minen brief ver sigelt mit minem jnsigel ze ainem vrchvnde diser rede vnd diser sache. Ditze ist geshehen nach Christes gepurde vber Tousent jar, Dreu hvndert jar, dar nach in dem vierden jar an vnser vrowen tach in der vasten.

Source Fulltext: OÖUB 4 (Wien 1867) S. 459-460, Nr. 495