Ich Espein von Hag tv^en chunt allen den, di disen brief ansehent vnd ho^erent lesen, di nv sint vnd noh chvnftich werden, daz ich mit gutem willen meiner Hovsvrôwen vrôn Haylweigen vnd meiner chind Chvnegunden, Jacobs, Hainrichs vnd wernhers vnd nah an der meiner vrevnt raˆt (dem) erbern alt Chvnraten vnd seinem Chloster ze wilhering gesatzet han vuer Ochtzig pfunt pfenning winner mv^enzz ze geben auf sant Jacobs tag in dem snit, mein Hub ze Hoenperg, auf der alhart sitzet, vnd mein Hvb ze Prantsteten enhalbe der (Roteln) gegen Nevzzedling vber, di mein reht chaufaigen sint, mit alle dev, vnd da zv gehoret, ez si an acher, an wismat vnd an Holtz oder swi Ez benant ist, besuht vnd vnbesuht vnd mit allem dem nv°tz, den si von den selbeu zwain huben gehaben mugen, vnd sol auh der selb nvtz di weil, vnd ich niht loes, datz dem selben Chloster mein selgerêt sein, wer awer daz, daz ich (di vorgenanten) zwa hvb niht loesen wolt oder moht, swer oder swelch danne vnder meinen gerben oder andern meinen vrevnden, di nah mir mein gut (besit)zent, di selben zwa Hub Haben wellent, di svllen dem vorgenanten Chloster ze wilhering geben Ochtzig pfvnt pfenning wienner mv^enz ze dem tag, als vor geschriben ist, vnd vnderwinden sich also der vorgenanten zwaier Hub. Daz dem vorgesehriben (Chloster ze wilhering) diser satz vnuerchert vnd an chrieg beleib, so gib ich im dar vber ze vrchvnde (disen briefF versigelt) mit meinem jnsigel vnd mit Hern Rugers jnsigel vom Hv^ett, vnd sint des geczevg Her Hainrich von volchenstorf, Her Heinrich von Lonstorf, Her perchtolt (von harthaim) vnd Perchtold sein svn, Her Peter von Harthaim, Her Reicher von (perchaim) Her Meinhart von Chlingelbrunne, Her Hainrich von (wuldenstorf) Her Hainrich von alharting vnd (ander) levt gnuch. Diser brief (ist geben, do) von Christes geburd waren Tausent jar, Drevhundert jar, in dem (fvnften jar), an dem nehstem suntag nah dem (perchttag).

Source Fulltext: OÖUB 4 (Wien 1867) S. 472-473, Nr. 509