Ich Chvnrat der ygil vnd mein sv°n der jung ygil burger ze Pazzawe vergehen vnd offen an disem brief allen den, di nv sint vnd noh chvmftich werdent, Daz wir mit gutem willen vnd mit verdahtem mvt vnser vnd vnser Hovsvrô ... vron Gedrovten vnd vron Jeuten ein halbes hovs ze Pazzawe in der stat bei den Nidern prottischen gerihts gen albern den Chvrsner vber, daz vnser waz vnd vns angeho^ert, dem Chloster vnd der Sampnvng ze wilhering ledichlich durch got ze selgeret haben also gegeben, daz di vorgnant Sampnvng ze wilhering vnser vnd aller der, den si sein schuldich vnd enbvnden sint, ewichlich in irm Chloster vnd an irm gebet gedenchen schulln vnd sol auh deu vorgnant Sampnvng ze wilhering mir vnd meinem svn Chvnraten, der vorbenant ist, von selben halben hovs siben schilling pfening Pazzawer alle jar am weinaht tag geben vnd suln auh zwen pfening von dem vorgnanten halbem hovs ze Purchrecht geben den vrôwen in daz Chloster, vnd daz daz stet vnd vnuerchert beleib, geb wir der vorgenanten Sampnvng ze wilhering disen brief versigelt mit vnsern jnsigeln vnd bestetigt mit den gezevgen, di hie geschriben stant. Daz ist von erst Perchtolt an dem Portz, Friderich des weinciher aidem, Hainrich vnser Ohaim, Chunrat der Solner vnd Eberhart sein bru^eder, Hainrich der glaser, Chvnrat der glaser, wernhart von Ottenshaim vnd ander pidber levt gnvg. Ditz ist geschehen, do von Christes geburd warn Tausent jar, Drevhvndert, in dem nevnten jar des svntages ze mitter vasten.

Source Fulltext: OÖUB 5 (Wien 1868) S. 15, Nr. 12