Wir bruder wisent abt ze wilhering offen vnd tvn chvnt allen den, di disen (brief) ansehent oder horent lesen, daz vns vnd vnserm Chloster der Erber man her Chvnrat der ygil Purger ze Pazzawe ein halbes hovs in der selben stat bei den Nidern brottischen gerihts gen albern dem chu^ersner vber ledichlich durch got ze selgeret gegeben hat also, daz wir vnd vnser Sampnvng ze wilhering sein vnd swem wir sein dar vmb schuldich vnd enbvnden sein, ewichlich an vnserm gebêt gedenchen schuln vnd schuln auh wir vnd vnser Sampnvng ze wilhering dem vorgnanten hern Chvnraten dem ygil von dem vorgnatem (sic) halben Havs siben Schilling pfenning Pazzawer alle jar am weinahttag an allen chrig vnd wider red geben; swenn awer wir vnd vnser Sampnvng di selben siben Schilling pfenning hern Chvnraten dem ygil am weinahten tag niht engeben oder dar nah in einem manet, so sein wir im zwelf pfenning schuldich ze pezzerung vmb di Savmvng, als oft offt (sic) daz geschiht. vnd daz daz stet vnd verchert (sic) belieb, geb wir dem vorgenantem hern Chvnraten disen brief versigelt mit vnserm insigel. Ditz ist geschehen, do von christes geburd warn Tausent jar, Dreyhvndert iar, in dem cehentem jar.

Source Fulltext: OÖUB 5 (Wien 1868) S. 40, Nr. 38