Ich Hertneid von lichtenwinchel vergich vnd tv^en chvnt allen den, di disen brief sehent oder horent lesen, daz ich mit verdahtem mvt vnd mit gůtem willen meiner Hovsvrowen vron Rihtzen, Ottens vnd Pernhartes meiner sv^en vnd aller meiner chinde vnd miner gerben vnd mit guter gunst Hern Ru^edolfs meines pruders, Rudolfs seins sv^ens vnd aller seiner gerben han geben vnser vrowen ze wilhering vnd ir dinern da selben ze selgeraet ab meiner Housvrowen sel vnd ab der meinen mein Hvb ze Tratwerd mit alle dev, vnd dar zv^e geho^ert, swi ez genant ist, vrilichen ze haben in rehter aigens gwer ebichleichen an allen chrig also mit beschaidner red, daz man an vnser paider iartag mein vnd meiner Hovsvowen, den ich nach meiner vreunt rat auf (ainen) genannten tag legen wil, sol (den) selben Herren ze wilhering dinen von dem vorgenannten gv^et ze Tratwerd, swaz ez an phenning geltent ist, mit win vnd visschen ze hail vnser sel vnd ze pezzervng ir phrv^ent. Daz dis gab vnd (dise andacht) staet ebichleichn beleib, des gib ich den vorgenanten Herren ze (wilhering) disn brief ze (einem) vrchvnde versigltn mit meinem jnsigel, mit meins prvder jnsigel Herrn Rvdolfs vnd mit (meins Suns) jnsigel Ottens von Lichtenbinchel vnd bestaetigt mit den zevgen, di hie geschriben (sindt, Daz ist der) Rat Her Hoertneid, Her Hertwich der strachner, Otacher der fv^erter, Rudolf vnd Levtold von Chirchberch vnd ander pider levt genv^ech, den daz chvnt ist. Daz ist geschehen, do von Christes (geburdt) waren Tavsent jar, Dreuhvndert jar, jn dem dreizenten jar dar nach an dem Ohten (tag nach der) Epiphnei. (sic).

Source Fulltext: OÖUB 5 (Wien 1868) S. 94, Nr. 91