Wir abpt Hainrich vnd di Sampnvng ze Wilhering veriehen an disem brif allen den, di in sehent oder hornt lesen, daz der ersam man Her Ditmar von Aystershaim ze selgeret ab seins vater vnd auch seiner mvter sel vnd durch got vnd auch ab seiner sel vnd seiner housvrown vnd aller seiner vordern sel hat gegeben ledichleichen vnser vrown ze Wilhering sein gůt ze stetten ob Euerding, daz er vnd wir miteinander haben gehabt, vnd da wir vor nicht mer danne saetzich phenning haben auf gehabt also, daz ez gantz vnd gar mit alle dev, vnd dar zv gehort, swi ez genannt ist, zv dem Gotzhaus ze Wilhering gehorn sol vnd im dienen sol als ander vnser aigen ebichleichen an allen chrieg, vnd swan er verschaitt von diser werlt vnd vns chvnd wirt getan, so sol wir in nemen mit vnserm wagen, ob wir in geraichen mvgen in dem Lant, vnd soln in fvren in vnser chloster vnd bestatten vnd im begaen vnd singen vigilig vnd saelmess vnd ander andacht, als wir gewilich (sic) sein ze tv°n vnsern pru^edern vnd andern, di vnsers Gotzhaus vrevnt sint. Dar vber geb wir vorgenanten hern Ditmarn von Aystershaim vhd seinen erben ze einem vrchvnde disem brief versigelten mit vnserm Insigel. Daz ist geschehen, do von christes geburd warn Tausent Jar, Drevhvndert Jar, Dar nach in dem Sibentzehenten Jar des vreytages vor weihnachten.

Source Fulltext: OÖUB 5 (Wien 1868) S. 200-201, Nr. 201