Ich Graff Hainrich von Schaunbergk mitsambt meinen Bruedern Bernnharten, Rudolfen, Wilhalmen, Levtolden, Fridreichen vnd Otten vergich vnd thuen khunth allen den, di disen brief sehenndt oder ho^erendt lesen, das wir mit bedachtem Muet vnd mit guetten willen Nach Ratt vnser Edlen lewt alle die brief vnd alle dew recht, die das Go^etz haws vnd die Herrn zu Wilhering von vnnserm vatern sa^eliger gedechtnus vnd von anndern vnnsern vordern habend gehabt vnd auch habendt herbracht vntzt an vns an allen krieg vnd als jr brief vnd Hanndtvesst sagendt, die wir gemainklich gesehen vnd gehört haben, Dieselben recht die Erkhennen wir alle vnd vernewen jns also recht vnd redlich, Das weder wir noch vnnser Erben chainer kunfftigclichenn noch kainer vnser Richter von des vorgenannten Closters zw Wilhering aigen noch von seinen lewtten wellen noch ensullen chain sache richten claine noch grosse on allain ein sollich sach, dy da ziehent an den tod, daruber sew nicht ze richten angeho^ert, alle annder sache su^ell der abbt oder wem Er sein phleg enphilicht, enten vnd richten an allen Krieg. Wer aber, das des nicht geschehen sol, das der Abbt oder sein verweser chainem verhabt vnnd versagt das recht von seinen lewtten, dij dem Gotzhaws zugehörenndt, Das man Bewären vnd fuerwar gesagen mag, demselben mag vnnser Richter das Recht thuen vmb dieselbig sach zw derselben stundt. Daru^eber Bestättig wir vnd vernewen demselbigen Gotzhaws zw Wilhering alle dew reht, dy es hat von vnnserm Vater vnd von vnnsern vettern vnd von anndern vnnsern voderen auff allen jren guetern vnd besunderlich auff zwain gu^ettern zu Hytzing, auf zwain zw Thening, auf ainem zw Pasching vnd auf ainem zu Offthering. Vnnd das die red dem Gotzhaws zw Wilhering stätt vnd vnzerbrochen Ewiglichen beleib, des gib jch den Herrn zu Wilhering disen brief versigelten ze einem vrkundt mit meinem jnnsigel, Wann chainer annder meiner Brueder ze disen Zeiten aigens Innsigels nicht enhabendt. Des sindt zewg her Ruedolf der Schiffer, Her Sighart von Grueb, Her Wernhart von Rotenfels vnd annder piderb lewt genueg. Das ist geschehen, do von Cristes geburd waren Dreyzehenhundert Jar, darnach jn dem Achtzehennten Jar des negsten Suntags nach Sannd Jacobstag.

Source Fulltext: OÖUB 5 (Wien 1868) S. 225-226, Nr. 229