ICh vlrich dar Pruschinch vnd Ich fridreich sein Pruder Wir veriehen vnd tvn chvnt allen den, di disen Brif sehent oder hornt lesen, daz wir mit veraintem mv^et vnd nach rat vnserr vrevnt Dem Gotzhaus vnd den Geistlichen Herren ze wilhering ze Pezzerung irr phru^ent in der vasten mit anderm gut, daz in von vnsern vordern warden vnd gegeben ist ze hail vnd ze Trost vnsers vater Hern Rvgers, Levtoltz vnsers Bruders, den Got genad, vnd auch aller vnser vordern vnd nach chomen geschaft vnd ledichleichn gegeben haben Saechs schilling winner phenning geltes Rechtes Pvrchrechtes auf vnserm Haus ze Euerding, daz weilen des Velner waz vnd daz vnser Bruder Levtolt saeliger gehugnvz mit sampt vns Chvnratn oeitzen svn vnd seiner Housvrown vnd alle irn Erben gegeben hat ze verchauffen vnd ze versaetzen, swem si wellent, ze Rechten Purchrecht also beschaidenlichn, daz si oder swer daz vorgenant Haus inne hat, iaerchleichn an sand Andres tach ze Purchrecht geben sol Saechs winner phenning. Geschech des nicht, so svlen deu wandel dar auf gevallen, als si ze recht auf Purchrecht gevallen svln, als di Brif sagent, di wir im dar vber gegeben haben. In dem selben recht hab wir di egnanten Saechs schilling winner phenning geltes Purchrechtz dem Gotzhaus ze wilhering ze saelgeret gegeben ewichleichn ze haben an allen chrieg. Wir svln auch mit sampt vnsern Erben des selben Purchrechtz des gotzhaus gewer sein an aller stat, do in des not geschiecht vnd dar vber ze einem vrchvnd vnd ebigew stet geb wir vlreich vnd Fridreich Bruder genant di Pruschinchn dem Gotzhaus ze wilhering disen Brif versigeltn mit vnsern jnsigeln. Vnd sint des zeuch Her Hertwich ab dem Strahen, Wernhart der Mezzenbech, Meinhart der Schondarfer, Peter Pope vnd ander piderb leut gnvch. Daz ist ergangen, Do von Christes geburd warn Drevzehenhvndert jar, dar nach in Dem ainsunzwainzigisten jar an sand Katrein tag.

Source Fulltext: OÖUB 5 (Wien 1868) S. 305-306, Nr. 316