Wir Heinrich von gotes gnaden Hertzog ze Osterreich vnd ze Steyr Embieten vnsern getrewen lieben allen vnsern dienern Edeln vnd vnedeln vnd darzv° allen, den der brief wirt gezaiget, vnser gnade vnd allez gůt. Wir haben angesehen vnd erchennet den grozzen schaden vnd presten, den die ersamen vnd geistleich Lewte der Apte vnd der Conuent ze Wilheringen genomen habent vnd emphangen vnd de sij auch tagleichen nement vnd leydent vnd haben in darvmb die besunderleich gnad vnd ... erung getan, daz si vnd ir gotzhaus von hinnen vntz hintz den nechsten Weihennachtag (?) vnd von dannen vber ain gantzes jar frey vnd ledich sullen sein Geste vnd auch aller gastunge dar vmb, daz si Got dester emzclichen gedienen mugen. Vnd dar uber gebieten wir vnd enphelhen ev allen vesticleichen vnd wellen ez auch bei vnsern hulden, daz ir ez also stät habt vnd wider vnser gnad ichtes tut vnd daz ir oder ieman ander dem vorgenanten Apte vnd dem Gotzhaus dheinen schaden oder vngemach oder lait dar uber tüt an iren levten oder gůt. Swer aber dar wider ichtes tet, daz were wider vns vnd vnsern gnaden brief vnd dez ze einem vrchund geben wir vnsern brief versigelt mit vnserm Insigel. Der brief ist geben ze Lyntz do man zalt von Christes gebrud drewzehenhundert jar, dar nach drev vnd zweinzich jar des Svnntags nach Sant Andres tag.

Source Fulltext: OÖUB 5 (Wien 1868) S. 371, Nr. 375