Ich Philippe Hainreichs des Malchinger sůn vnd alle mein Erben, di ich han oder gewinne, veriechen offenbar an disem prief allen den, di in sechent lesent oder ho^erent lesen, Daz wir mit gunst vnd mit gutem willen aller vnser Erben ze chauffen haben gegeben Vron Perichten vnd allen iren Erben redleichen vnd recht mit aller stet daz gu^et vnd allen den Erbtail, vnd ich gehabt han auf dem Dietreichsperig mit allem dem recht, als iz mich von meinem Enn Alberen dem Malchinger an erstorben ist, jz sei ze haus, ze veld oder ze Holtz, versuecht vnd vnuersuecht, vmb fumf vnd zwaintzikch phunt wienner phening, der sev mich vnd mein Erben recht vnd redleichen verricht vnd gewert habent. Iz schol auch di selb vro Pericht vnd ir Erben mit dem vorgenanten gut Allen iren frum schaffen ze verchauffen vnd ze versetzzen an allen chrieg mein vnd aller meiner Erben vnd frevnten, swanne si wellent, vnd auch mer allen den chrieg vnd ansprach, den ich vnd alle mein Erben furbaz hintz vron Perichten vnd hintz iren erben, jz sei vmb daz vorgenant gu^et oder vmb di vanchnuesse oder vmb swelcherlay chrieg oder ansprach, di ich emalen gegen ir vnd allen iren Erben gehabt han oder noch furbaz gehaben mo^echt, daz di in di vargenanten phening geschaiden sint mit meinem gu^etleichen willen Also, daz di furbaz alle tod vnd Abgenig sind. Daz di red stete beleib, dar v°ber geb wir disen prief versigelten mit des erberen herren jnsigel Heren Eberharts von walsse vnd mit den jnsigeln der Lantrichter in der Riedmarich heren fridereichs des schrautolfs vnd Wolfharts des Guelen vnd mit philipps des Holtzhaimer jnsigel, der ze den Zeiten Richter ze Lintz waz, vnd mit fridereichs des Tumizzinger (Tunnzinger?) insigel, vnd ich Philippe der Malchinger mit meinem jnsigel. Der brief ist gegeben, do man zalt von Christes gepurd Drevtzechen hundert jar, dar nach in dem fumf vnd Dreyzzigisten jar des nechsten phintztags nach vnser Vrowen tag ze der Liechtmisse.

Source Fulltext: OÖUB 6 (Wien 1972) S. 146f., Nr. 139