ICh Eberhart purchgraf ze Ottenshaim vergich vnd tvn chunt allen den, di disn Brif sehent oder hornt lesent, Daz (ich mit verdachtem mvt vnd mit gutem willen meiner Housvrôwn vron Agnesen vnd aller meiner (erben ab) meiner vnd aller meiner vordern sael willen han gegeben abpt Hermann vnd dem Gotz haus ze (wilhering mein) wis vnd meinen Acher Pey sand Gallen (Nevnchirchen), di ich gechauffet han von fridreichn dem (Geir)sperger also daz di geistlichen Herren ze wilhering di selbe wise vnd Acher svln in aigens (gwer) vnd nu^etz besitzen vnd haben (ewichleich an) allen chrieg mit beschaidner red, daz si meinen jartag von dem vorgenanten aigen, daz (geraittet ist fur) zwelf schilling geltes, ierchleichn svln begen nach irs Ordens gewonhait des Suntages ze mitteruasten vnd da von dienen vnd geben ze pezzerung (irr phru^ent) den Herren in (irr refent ein gu^et mal) vische, Brot von semeln vnd (di grozzer masse) weins, (da pei si) meiner sael dez derbaz gedenchen. Wer (aber, das) daz dinst vnd mal verzogen vnd nicht gegeben wurd, vnd ez verschriben ist, des selben jars (suln sich di Herren von pawngartenberg) der egnanten wise vnd acher vnderwinten vnd inne haben als lang, (vntz es gepe) zzert werd, (das versaumpt wirt.) Auch lob (ich der wise) vnd auch acher scherm vnd gwer (sein an aller stat,) vnd den (Herren ze wilhering) not vnd dvrft geschech, nach landes recht. Vnd dar vber gib ich in ze einem vrchund (disen brief) versigelten mit meinem (jnsigel. des sint zeuch) Her Ditrich der wenesch, Her Hainrich der (Stainpech, der) Seybot sweinpech, Der Hainrich Sweinpech, Der Ortolf in der Trefnik, {der Ott nider) Trefnik, Der (leb, der) Trvnnpuchler, walther der Regenspurger vnd ander piderb leut genuch. Daz ist geschehen nach Christes gepurd Dreuzehenhundert jar, in dem fumf vnd Dreizigisten jar des Mantages nach dem Palmtach.

Source Fulltext: OÖUB 6 (Wien 1972) S. 158, Nr. 152