Ich Peters, ich Katreyˆ, ich Margret, ich Chunegunt vnd Elspet Hermans des Geytzesteter To^echter vnd ich Hainreich, ich Peter, ich Charel vnd ich Chunrat sein Bru^eeder wir veriehen offenbar an disem brief allen den, die in sehent oder hoernt lesen, di nv sind oder her nach chu^enftich werdent, Daz vnser lieber vorgenanter vater vnd Brueder Herman der Geytzesteter vnd sein Haussvrow Chunegunt vnser lieben Mueter vnd Swester habent den Erbern geistleichen Herren Abpt Herman vnd der Sampnunge ze Wilhering ze chauffen gegeben daz Guet ze Durichsteten, daz da haizzet an der Hoemerwis, ist gelegen in Woessenberger gericht. Nv hete wir nicht fu^ertzicht getan an dem selben guet vnd wurden ze chrieg mit den vorgeschribenn Herren von Wilhering vmb daz oben geschriben Guet als lange, daz wir sev dar vmb ansprachen mit dem Rechten. Da berichteten sich die obgenanten Herren von Wilhering mit vns vnd mit allen vnsern Erben vmb den chrieg, den wir heten vmb daz vorgeschriben Guet vnd gaben vns do fu^er Sechs pfunt alter wienner phenning; do teten wir vnd vnser Erben rechteu fu^ertzicht an dem obgenanten guet also beschaidenleich, daz wir alle vnser Erben fu^erbaz dhainen chrieg noch ansprach dar nach nicht haben schullen. vnd dar vber. ze einer pezzern Sicherung vnd staetichait so geben wir den obgenanten Herren von wilhering funftzich alter wienner phenning ze rechtem Satz ouf dem vorgeschribenn Guet also mit der beschaiden, ob ieman her fu^er choem, der pezzer Recht haben wolt zv dem obgeschribenn Guet vnd die vorgenanten Herren von wilhering dar vmb ansprach, so schulle wir des vorgeschribenn Satz ir recht gewern sein ouf dem obgeschribenn Guet an aller der stat, vnd in des not geschiecht, nach des Lantz recht ob der Ens. Waer aber, daz wir in di gewerschaft indert vertzugen, swaz si des schaden naemen, den der obgeschribenn Herren von Wilhering ainer bei seiner beschaiden an recht gesprechen mag, den schulle wir in gantz vnd gar ab tuen vnd wider chern vnd schullen sev daz haben ouf aller der hab, di wir besucht vnd vnbesuecht indert haben, wand wir vnd vnser vorgenanter Vater vnd Brueder der vorgeschribenn fu^enftzich Pfunt phenning gantz vnd gar von den Herren von Wilhering bericht vnd gewert sein. Daz in di Red vnd di Tayding also gantz, staet vnd vnuerchert beleiben, dar vber ze einem warn vnd vesten vrchu^end geb wir in disen offenn Brief versigelten mit vnserr genaediger Herren hern Reinprechtz vnd hern Fridereichs von waltsse jnsigeln vnd mit vnserr lieben frevnt jnsigeln hern Chvnratz vnd hern Pilgreims der Woelch vnd dar vnder verpinden wir vns mit allen vnsern Erben mit vnsern trewˆn an yˆades stat alles daz stet ze haben vnd ze volfu^ern, daz vor an disenr Brief verschriben stet, wand wir aigener jnsigel nicht enhaben. Der brief ist gegeben, do von Christes gepu^erd ergangen warn Drevtzehen Hundert jar, dar nach in dem viertzkisten jar an Sand Merteins Tach.

Source Fulltext: OÖUB 6 (Wien 1972) S. 353ff., Nr. 349