Ich Ruger der Heresinger Purger ze Lintz vnd ich Elizabeth sein Hausfraw Wir veriehen offenlich an disem brief allen leuten, di in sehent oder horent lesen, Daz wir mit wol verdachtem mu^et vnd mit gutem willen aller vnser vrev^ent ze der zeit, do wir ez wol getun mochten, ze Saelgeret ab vnserr vnd vnserr voruodern Sael vnd durch vnsers liben Svns willen bruder Michels, der sich in den saeligen Orden ze Wilhering ergeben hat, vnser Aecher, di in dem Purchvrid ze Euerding ligent, do von wir dem Richter ze Euerding jaerchleich dienn zwen phenning ze Purchrecht an dem Prehen Tag vnd der vier vnd zwaintzig jeuch noch vnserr achtung schol sein, dem selben Gotshous ze Wilhering ledichleich vnd aigenlich gegeben haben nach unserr baideu tod ebichleich ze besitzen vnd in nutz vnd in gewer haben mit allem dem Recht, vnd wier ez her bracht haben, an allen chrieg aller vnser erben vnd vrevnt Also beschaidenlich, Swann wier baideu nicht ensein, swie dann die êêgenanten Aecher funden werdent, also schuln sich ir di Erbern gaestliehen Herren von Wilhering vnderbinden vnd schaffen do mit irn fru^em als mit anderm irem Gu^et. Si schuln auch vnsern Jartag do von alle Jar begen mit andacht noch des Ordens gewo^enhait vnd die gemain an dem selben Tag mit einem mal, Daz ist vischen und mit weizzen brot trosten, daz si dester andechtichleicher vnserr Sael gedenchen. Daz diseu andacht vnd Red also staet vnd vnzebrochen beleib, dar vmb geben wier in disen brief versigelten mit meinem vorgenantes Rugers des Heresingel (sic) jnsigel und mit Mertein des Ribeisen ze den zeiten Richten ze Euerding Insigel. Der brief ist gegeben, do von Christes gebu^erd ergangen warn Drevtzehen Hundert Jar, dar nach in dem drev vnd viertzigisten jar an vnser Vrowen tag ze ierr chundnusse.

Source Fulltext: OÖUB 6 (Wien 1972) S. 444, Nr. 438