Wir Abbt Herman vnd dy Samung zu Wjlhering vergehen offenbar an dem Brief allen lewten, Dy in sehent oder horent lesen, das wir dem Erbern Hern Hern Hansen pharrer zw Stranssdorf gelten schullen hundert phunt vnd zwaintzig phunt alter wienner phennig vnd schullen dy geben den Erbern geistlichen hern dem Abpt vnd dem Conuent zw Alderspach an dem aigenn, das do haist Gotzsdorf, das der vorgenant Her Hans dem Gotzhaus zw Gotzstal von in gekhaufft hat, an sand jorigen tag, der schierist kumbt oder wan man die anndern phundt an dem egenanten dorf richt, Waˆr aber das gethan, das der eegeschriben Her Hans die phennig selben vessen wolt, (oder) iem ander schaffen wolt, dem schull wir sy geben an alle widerred vnd vertziehung. Taˆt wir des nicht, was er der phennig dann schaden naˆm, den schull wir im widerkern vnd schol vns darumb der Edel vnnser genediger Her Her Eberhart von walsse vnnser vogtt vnd lanndrichter ob der enns phennden mit vnnserm guetlichen willen auf wasser vnd auf lannd, vnd scholl der offtgenant Her Hans das habenn auf alle dem, vnd vnser Gotshaus hat in dem lannd zu O^eesterreich vnd auch ob der Enns Mit vrkhundt ditz briefs, der versigilt ist mit vnsern baidn anhangunden Insigelnn, Das ist geschehen do von Christi gepurd ergangen waren dreutzehen hundert Jar, dar nach an dem drew vnd viertzigisten Jar an sand Merteins tag.

Source Fulltext: OÖUB 6 (Wien 1972) S. 455f., Nr. 451