Ich Pericht di Zaertin vnd ich Peter ier svn vnd mein tochter Chlar, ier enichel vnd alle vnser erben wier veriehen offenbar vnd tu^en chunt allen den, di den brief sehent oder lesen horent, Daz wier mit wolbedachtem mu^et vnd zu^e den zeiten, do wier iz wol getu^en mochten, vnd mit vnser erben gu^etleichen willen recht vnd redleich geschaft haben, daz nach vnserm tot, ob wiers verhaben mugen oder wellen, durch vnser sel hails willen vnd aller vnser vorvodern sel willen, so schaf wier der saeligen sammvng dem abt vnd allen seinen herren hintz Wilhering vnser siben gu^et, di gelegen sint am Dietreicksperig, der ains haist im Raeut vnd ains auf der Straeutzen vnd ains datz der Chnochen vnd ain mul haist datz der Mierelln vnd drev gu^et ligent bei ein ander da bei, versu^echt vnd vnuersu^echt mit allem gelt vnd mit allem nu^etz, als wiers gehabt haben an daz ain, daz sev alle jar von den vor genanten gu^eten ains an sand Nyclas tag raichen vnd geben schullen hintz der pharr ze Lintz, swer so pharrer ist, sechs schilling phenning alter winner, vnd hintz dem spital den sieben ze Lintz auch sechs schilling phenning winner. Mit solher beschaidenhait alle di weil, daz her Dietreich der Malhinger, her Wernhart der Hurnprech, her Haistolf der Tungozzinger, daz di drei den nu^etz vnd di selben gu^et schullen inn haben vnd schullen vns da von ze iern tagen alle iar ainn jartag begen also, vnd sev sein mit sampt vns von got Ion enphahen wellen vnd schullen auch daz tun, di weil ier ainer lebt, awer nach der dreir herren tot so schol sich sein di sammvng vnder winden, vnd schullen vns vnsern jartag begen nach iern trewn, vnd swas vber den jartag beleibt, daz sol der abt geleich tailen vnder sein sammvng, daz aim als wol geschech als dem andern. Vnd waer, daz sev daz nicht taeten, so schullen sich vnser naegst erben des vorgenanten gu^etz vnderwinden vnd schullen den jartag begen, als vor verschriben ist. Vnd waer awer, daz vnser dreier ains als lang lebt vnd wolt daz daz (sic) vorgenanten gueter veraendern, oder di selben gu^et verchauffen oder versetzzen, daz sol noch mag dar an niemt engen noch irren. Daz di red staet vnd vnzebrochen beleib, dar vber geben wier disen brief gesigelten mit vnsers lieben herren hern Eberharts von Waltse anhangundem jnsigel, der ze den zeiten hauptman was ob der Ens, vnd mit vnser baider anhangunden jnsigel. Der brief ist gegeben nach Christes gebu^erd dreutzehen hundert jar, dar nach in dem nevn vnd viertzkisten jar an sand Merteins tag.

Source Fulltext: OÖUB 7 (Wien 1876) S. 150f., Nr. 151