Ich Ru^eger von Humbrechtzried ze den zeiten purkraf ze Otenshaim vnd alle mein erben vergehen vnd tv^en chunt allen den, die disen prief sehent oder ho^erent lesen, daz wir mit wol bedachtem mu^et vnd nach rat vnserer pesten vrevnt vnd mit aller meiner erben gu^etleichem willen vnd wart ze den zeiten, do wir iz wol getu^en machten, vnd mit gesampter hant ze chauffen haben geben vnsern hof ze Aychperig, der da leit zenachst dem O^edhof in Greymhartsteter pfarre, der vnser aygen gewesen ist, versu^echt vnd vnversu^echt, ze holtzz vnd ze velde mit allen den nu^etzen, die dar zv^e gehörent, abpt Wernharten ze Wilhering vnd der sampnung da selb vmb achtzig pfunt wienner pfenning, der wir gewert sein gantz vnd gar. Ich vorgenanter Ru^eger von Hvmbrechtzried vnd alle mein erben schulen auch des vorgenanten chavffs auf dem vorgenantem hof ze Aychperig ier gewer sein nach lants recht, wo in des no^et vnd du^erft geschiecht. Waer aber, daz in die gewerschaft indert verzogen wu^erd, naemen si dar vber dhainen schaden, den der herren ainer mo^echt gesprechen pei seinen trewen mit einer gewizzen, den schu^ellen wir in ab tv^en vnd schu^ellen si daz haben auf vnsern trewen vnd auf aller vnser hab di wir haben. Waer aber, daz iemen her nach cho^em der pezzer erb wolt sein denn die vorgenanten herren, der schol in geben achtzk pfunt wienner pfenning. Daz jn die red staet vnd vnzebrochen beleib, dar vber geben wir in disen prief versigeltem mit vnserm anhangundem jnsigel vnd mit hern Jacobs jnsigel des Strahner ze den zeiten pu^erkraf ze Waessenberch vnd mit Ludweigs jnsigel des Ludweigsdorffer, die ir jnsigel an den prief habent gelait zv^e einer zevgnu^esse in an schaden. Der prief ist geben, do man zalt von Christs gepu^erd drevzehen hundert jar, darnach in dem fv^emf vnd fu^emfzigistem jar des maentags nach sand Georgen tag.

Source Fulltext: OÖUB 7 (Wien 1876) S. 410f., Nr. 398