Ich Jans der Tungozzinger pharrer ze Altenliechtenbart ich Paul der Tungozzinger sein pruder ich Philipp des Tungozzinger aydem ich Lobley sein hausfraw jeh Katrei di Lerczinn vnd all vnser erben vergechen vnd tu^en chund allen den di den brief sechent ho^ernt oder lesent, daz wier mit wolbedachtem můt nach vnser vrevnd rat vnd gunst recht vnd redleich ze chauffen haben geben dem erbierdigen weysen geistleichen herren abt Wernhart ze Wilhering vnser ansidel ze Aychperig vnd swaz wier da haben vnd den zechent daz freys aygen ist, also wier es in nutz vnd in gewer habent gehabt ze holtz vnd ze veld, versu^echt vnd vnuersu^echt, vnd haben auch iem die hantfest di wir darvber gehabt haben mit sampt dem gegenbu^ertigen brief ingeantbu^ertt vnd gegeben vmb einen gelt dez wir garttz vnd gar gewert sein. Wier sein auch dez vorgenanten gu^ets vnd auch dez zehentz sein gwer wo iem dez no^et geschicht ze einem rechten freyn aygen als lantz recht ist. Gieng aber iem an der gewerscheft icht ab oder daz iem dhain chrieg da von auf erstu^end von wem daz wa^er vnd wie sich daz fu^egt, den schullen wier iem gantz vnd gar ausrichten vnd vnd (sic) richtig machen an allen seinen schaden. Vnd nympt er darvber dhain schaden, den schull wier iem ablegen vnd schol er daz haben auf vnsern trewn vnd dar zu^e auf aller vnserer hab swo wier di haben versu^echt vnd vnuersu^echt. Vnd swer vns mit dem brief mont, derselb hat alle di recht auf dem vorgenanten gu^et vnd sein auch iem aller der gelub gepunden vnd schuldig als dem obgenanten herren vor an dem brief verschriben ist. Daz di red sta^et vnd vntzebrochen beleib darvber geben wier obgenant Jans Paul vnd Philipp den brief gesigelten mit vnsern anhangunden jnsigel vnd mit vnsers lieben bru^eder Fridreichs des Vngelter anhangundem jnsigel der daz an hat gelegt durich vnser pet willen zu^e einer zevgnuzz iem an schaden, da hinder ich mich egenante Katrei di Lerczinn verpint mit mein trewn allez daz sta^et ze behalten ind ze volfu^ern daz oben verschriben ist wann ich nicht jnsigels han. Der brief ist geben nach Christes gepu^erd drevczechen hundert iar vnd in dem siben vnd fumfczkistem iar an sand Katrein abent.

Source Fulltext: OÖUB 7 (Wien 1876) S. 535f., Nr. 525