Ich Ludwig von Noeundling und mein hausfrawe und ich Stephau Holczman purkgraf ze O^etensheym und mein hausfraw und ich Eberhart Ru^egers sun von Humrechczried dem Got genad und alle unser erben wier verjehen, daz wier uns recht und redleich und liebleich veraint und vertaidingt haben mit dem geystlichen erwierdigen herren abpt Walthern und dem convent ze Wilhering umb all ansprach und zu^espru^ech die wir gehabt haben hincz dem hof ze Aichperch der gelegen ist in Greymarsteter pharr in der grafschaft ze Woezzenberch, den si gechaufft habent Von Rugern von Humrechczried umb achczig phunt alter wienner phenning, und verjehen auch wier und all unser erben also bescheidenleich, daz wier fu^erbaz wier noch dhainer unserr erben mit rechter fu^erczicht nimmer mer dhain ansprach noch zu^eversicht hincz dem vorgenanten hof nicht mer haben schullen. Und waz wier daru^eber mit in ze rechten oder ze handeln haben wier oder unser erben ez sey mit recht oder an recht, daz habent si behabt mit allem recht vor allen richtern und vor dem lantzherren. Und daz in daz also staet und unczebrochen beleib, daruber geben wier dem vorgenanten abpt Walthern und der sampnung ze Wilhering den brief versigelten mit meinem Ludweigs von Noeundling anhangundem insigel und mit meinem Stephan dez Holczman anhangundem insigel und mit meinem Eberhart Rugers sun von Humrechczried anhangundem insigel, und ze einer pezzern zeugnuzz und sicherhait diser sache mit Chunrat purkgraf ze Wezzenberch anhangunden insigel und mit O^etachers dez Piber anhangunden insigel. Der brief ist geben do von Christi geburd ergangen warn drewczehen hundert jar darnach in dem vier und sechczkigistem jar an sand Oswaltz tag.

Source Fulltext: OÖUB 8 (Wien 1883) S. 185f., Nr. 182