Wier abpt Johannes und de sampnung dez goczhaus ze Wilhering verjechen, daz wier mit rat und mit gutem willen unsers convencz unserm trewn diner Chunraten dem Praitenlo^echer durch der dienst willen de er uns und unserm goczhaws erczaigt und getan hat und Osann seiner hausfrown und ieren zwain su^en Johannes und Wolfgangen verlichen haben unser gu^et ze Praitenloch, dez funfczig phenning geltz ist daz unser freizz aygen ist, zu einem leibgeding den vier leiben alz si genant sind, daz si daz gu^et schullen inn haben mit allen den ern und nuczen di dar zu^e gehoernt mit soelcher weschaiden, daz si uns da von nichcz mer schullen raichen noch geben nu^er den gewendleichen hant dienst den man von allter da von hat gegeben. Wier haben auch den obgenanten vier leiben unsern luz und unser wiz di gelegen ist pei dem obgenanten gu^et ze Praitenloch und haizt dez Geltinger wiz dez sechczig phenning geltz ist, und daz lechen vor dem holcz pei dem Haechleinsperig daz da haizt daz Wagen lechen dez drey schilling geltz ist, auch verlichen zu ier vier leben umb ein gelt dez wier gancz und gar gericht und gebert sein, daz si de auch schullen inn haben mit alle de und dar zu^e geho^ert, und schullen unz da von nichcz dienen noch raichen. Und wann daz ist daz di vier leib mit dem leben abgent und nimer sind da Got lang vor sei, swle dann de obgenanten gu^et und de wiz funden wernt alzo schullen wier unz undercziechen und underwinden daz da fu^erbaz niemant hat nach ze sprechen wider unz. Wier schullen auch der lechenschaft und der gu^etter ier hern und ier gwer sein wo und wann in dez nout und durft geschiecht nach lancz recht ob der Ens. Daz de red sta^et und unverchert weleib, daruber geb wier den brief versigelten mit unsern paiden anhangunden insigeln. Der brief ist gegeben nach Christi gepu^erd drewczechen hundert jar darnach in dem ainz und sybenczkisten jar an unser vrown tag ze der chu^endung in der heiligen vasten.

Source Fulltext: OÖUB 8 (Wien 1883) S. 519f., Nr. 524