ICH Chu^enrat der Volkchrat mein hausvrow und alle unser erben wier vergehen, das wier verchowfft haben unsers rechten freyen rittermezzigen aygens unser gůt gelegen ze Lynthaym in Greymhartzsteter pharr in Wechsenberger grafschafft und alles daz das zu demselben gu^et geho^eret, do man von alter untzher jerleich von gedient hat newn metzen chorns siben und zwaintzig metzen habern sechtzig wienner phenning ain scho^et harbs drew phunt pawmo^el zehen phenning fu^er weihenachtprot sechs huener sechs ches und sechtzich ayr. Das vorgenant gu^et ze Lynthaim mit aller seiner zuegeho^erung so vorbenant ist haben wier recht und redleich verchowfft und geben mit allen den nu^etzen ern und rechten als wier es unversprochenleich in aigens gewer herpracht haben umb zway und dreizzik phunt wienner phenning der wier gantz und gar gewert sein, der erbern vrown Dyetmu^eten hern Hermans seligen von Lanndenberkch wittiben zu den zeiten der hochgepornen fu^erstinne der hertzoginne in O^esterreich hofmaistrinne die das vorgenant gu^et gechoufft hat umb ier ledigs verdients varund gu^et, und hat ouch dasselb gu^et durch ierer sel und durch Otten seligen des Pibers und aller ierer vordern seln hails willen gegeben recht und redleich zu sand Larentzen gotshaws ze Greimhartzsteten ewichleich dopey zebeleiben. Und wannd der vorgeschriben dienst der von alter auf dem vorgenanten gu^et gelegen ist demselben gu^et nach der egenanten vrown Dyetmu^eten synne und dunkchen ze swer etwevil gewesen ist, darumbe so hat si von gnaden durch ierer und des vorgenanten Otten des Pybers und aller ierer vodern sel willen den vorgeschriben dienst geringert und den allen gelazzen an dreitzehen schilling und zehen phenning wienner mu^enzz geltes, die alle die die daz vorgenant gu^et ze Lynthaim inne habent und besitzent nu und hynfu^er ewichleich davon dienen sullen alle jar an unser vrown tag als si geporn ist, und sullen die rayhen dem zechmaister des vorgenanten gotshawses ze Greimhartzsteten wer der ye zu den zeiten ist, der sol denselben dienst innemen und nyemant ander und sol davon jerleich mit zehen schilling wienner phenningen ein ewigs liecht belaewchten vor sand Niclas altar in dem vorgenanten gotshaws. Denne die ubrigen drey schilling und zehen phenning geltes sullen gevallen zu einem ewigen jartag den man der obgenanten vrown Dyemu^eten und dem egenanten Otten dem Pyber und allen ieren vodern damit begeen sol in dem egenanten gotzhaws alle jar an sand Johanns tag der do ist an dem sechsten tag nach sand Philipps und sand Jacobs tag der zwelefpoten in so^elher weise, das ein igleich pharrer desselben gotshawses wer der ye ist alle jar an demselben sand Johanns tag den jartag begeen sol des abents mit gesungner vigili und des marigens mit einem gesungen selampt und mit zwayn selmessen gesprochen, und wenne der pharrer denselben jartag also begangen hat so sol im denne der zechmaister ze hant zu derselben stund die egenanten drey schilling und zehen phenning raihen und geben an alle widerred, und sol denn der pharrer davon geben den zwain priestern die er desselben tags zu im hat iegleichem zehen wienner phenning. Welhes jars aber das wer das ein pharrer des egenanten gotshawses wer der wer den egenanten jartag nicht begieng an dem tag so vorbenant ist und in der weise so vorgeschriben stet, oder ob in des ehaft not ierret daz er den nicht begieng darnach in den nechsten achttagen, so sol denne der zechmaister des egenanten gotshawses die drey schilling und zehen phenning die zu demselben jartag geho^erent tailen und geben desselben tags under arm laewten alsverre dieselben phenning geraihen mu^egen, mit ainer gewizzen der offtgenanten vrown Dyemu^eten und Otten des Pibers und aller ierer vodern seln ze hail und ze trost. Und sein auch wier ich egenanter Chu^enrat der Volkchrat mein housvrow und alle unser erben unverschaidenleich des vorgenanten gu^etes ze Lynthaim und alles des das dartzue geho^eret als vorgeschriben stet des egenanten gotzhawses ze Greimhartzsteten recht gewern und scherm fu^er alle ansprach als aygens recht ist und des lanndes recht ze O^esterreich ob der Ens. Und das der chouf die handlung und sache fu^erbas also stet und untzebrochen beleib in alle dem rechten so vor an dem brief verschriben und begriffen ist, darumbe so geben wier in den brief zu einen warn urchund und zu einer ewigen vestnung der sache versigilten mit meim obgenanten Chu^enrats dez Volkchrats angehangem insigil und mit des erbern Chu^enrats zu den zeiten purchgraf ze Wechsenberch insigil und mit meiner vettern insigilen Niclas und Otakchers der Volkchraten. Der brief ist geben nach Christes gepurde drewtzehenhundert jar darnach in dem vier und sibentzgistem jare des nechsten montags vor dem palmtag.

Source Fulltext: OÖUB 8 (Wien 1883) S. 686ff., Nr. 680