Wir Graf Hainreich zu Schaunberch bechennen offenleich mit dem brif allen den di in sehent oder Horent lesen, die nu sint vnd hernach Chünftig werden, daz wir mit gütleichem willen vnser vnd aller vnser erben vnd auch mit verdachtem müt vns veraint vnd beraten haben, daz wir gemainchleich vnser frawn vnd den Herren gemainchleich dez Goczhaus zu Wilhering ab vnß werden sol ab der vnsern vnd auch ab aller vnser nachchunftigen sel haben gegeben zu einem selgerät vreyung vnd füruart an vnser mautt zw Aschach also gänczleichen vnd ledichleichen daz di selben Herren zu Wilhering allez daz daz ir aigenhaft güt ist, swie ez genant wiert vnd daz si zü pesserung irr pfrünt wellent an legen ewicleich sullen für vnser vorgenanten Mautt zü Aschach füren ab vnd auf swan si wellent vnd alz offt si dez bedürffent in dem iar an alle vodrung vnd an alle mautt, wir wellen auch vnd gebieten allen vnsern mautern di zü disen zeiten sint oder chünfticheichen (!) werdent, daz si daz selbe vnser selgerät dem goczhaws zu Wilhering an thainerlay sachen krenchen sunder si lazzen alles ir güt füren swo si wellent an allen phranchsal vnd an alle irrung vnd daz die gab vnd di andacht also stät vnd ewig beleib, dez geb wir dem goczhaus vnd den Herren zu Wilhering zw einem vrchund disen brif versigelten mit vnserm grossen anhangunden Jnsigel. Der brif ist geben nach christi gepürt dreuczehen Hundert iar vnd in dem Ixxvj iar an sand Jacobs tag apostoli zc.

Source Fulltext: OÖUB 9 (Wien 1906) S. 123