ICH Hitschel jud ze Lincz vergich vnd tu^en kund fu^er mich vnd all mein erben, die ich hab oder noch chunftichleich gewinne, offenbar mit dem Brief allen, den er furbracht vnd geezaigt wirt, Vmb die geltschuld, so vns Rueger der Holczman vnd Chonrat Spa^et vnd ir erben schuldig sind, des wir jr brief haben, von der selben geltschuld wegen was vns jngeantwu^ert worden vnd heten vns in phandes weys vnderezogen des hofs genant der Chnolhoff in Greymerstetter pharr gelegen, Dar vmb zu vns chomen sind Stephann der Pyber vnd vlreich perndorffer vnd sein hawsfrow Elspeth vnd haben sich dar vmb lieblich vnd frewntleich mit vns bericht vnd vns ein gelt geben, des wir von jn gants vnd gar gericht vnd gewert sein. Dar vmb so sagen wir jn vnd allen jren erben, den egenanten hoff mit aller seiner zugehorung mit dem gegenburtigen brief ledigen vnd muzzigen. Also, das wir gen dem egemelten hoff vnd seiner zugehorung. vmb dhainerlay geltschuld, wie sich das vor her vncz auf hewtigen tag, das der brief geben ist, vergangen hiet, dhain ansprach, vodrung noch recht dagegen haben sol, vil noch wenig. Vnd des ze vrchund Geben wir jn den offen brief besigelten mit des Edeln erbern herren hern Hainreichs von waltse di zit Haubtman ob der Ens, vnd lewtoltz des Espa^en di zit Lantrichter doselbs baider anhangunden jnsigel, di durch vnser vleizziger pett willen der vorgeschriben sache domit zewg sind jn vnd allen jren erben an schaden, Darczu gesterkcht vnd beuestent mit mein obgenants hitschleins juden meiner aigner hant judischen vndergeschrift. Der geben ist an phincztag in der Quotember wochen ze Phingsten nach Christs gpu^erd Drewczechn hundert jar, Darnach in dem Acht vnd Sybenczkisten jar.

Source Fulltext: OÖUB 9 (Wien 1906) S. 457-458