Wier abpt Peter vnd di sampnung dez goczhaws ze Wilhering verichen vnd tun chund allen, di den prief sehent oder lesen horent, daz wir mit gutem willen vnsers conuencz vnd wolbedächtigchlich vnsern hof gelegen ze Talhaim, der von alter her genant ist der Munichhof, vnserm trewn Petrein, der weilent gesezzen ist auf vnserm hof ze Edremsperg, im vnd seiner hausfrawn vnd iren paiden erben zw einem freyen chauffrecht (verliehen haben)^a) in solher beschaiden, di weil si oder ier erben den vorgenanten hof inn habent, so schullen si vns jarlich da von dienen zw rechter dienst zeit vnserr chassten mazz acht schaf chornes vnd ains waicz vnd ains gersten vnd zwen mutt habern vnd ainen meczzen hanifs vnd di swein phenning vnd den hant dienst, alz er von alter her chomen ist, vnd besunderlich von ainer wiz drey mennt heiz, di gelegen ist pei dem hof. Vnd wann daz ist, daz sich der vorgenant hof verwandelt von ainem erben hincz dem andern, so schullen yeder man geben, der auf geit, ein halbs pfunt phenning, vnd der auf vert, ein halbs pfunt. Vnd wann wier vnser lewt steuren, so sind si vns nicht mer gepunden ze geben denn ein halbs pfunt. Sew schullen auch vnsrew tayding suchen vnd ze recht vor vns sten vmb all sache. Vnd wann daz ist, daz Peter vnd sein erben den hof nicht lenger gehaben mügen vnd ier recht dar an verchauffent, so schullen wir vnsern dienst vodern vnd nemen, alz er von alter her chomen ist. Daz di red also stet vnd vnuerchert peleib, dar vber geb wir in den prief versigelten mit vnsern paiden anhangunden jnsigeln. Daz ist geschehen, do man zalt von Christes gepurd drewzehen hundert jar vnd in dem vier vnd achczkistem iar an aller mann Vaschang tag.

Source Fulltext: OÖUB 10 (Wien 1933) S. 238-239