Ich Peter von Polhaim, di czeit rechter lehen herr der gmain lehen mein vnd aller meiner vettern von Polhaim, vergich offenleich mit dem gengbürtigen prief, daz für mich chommen ist Seydel der Mülner, di czeit gesezzen an der Tann mul zu Wels, vmb di hub gelegen ze Pasching in dem dorffe bey dem pache ze nachst dem gut, da di czeit der Haydel auf gesezzen ist, di er von mier vnd allen mein vettern von Polhaim ze lehen hat gehabt. Diselb obgenant hub hat der selb obgenant Seydel mit allem ierem zugehörn mit verayntem gutem willen sein vnd seiner erben var mier ledichleich auf geben zu dem erwirdigen goczhaws gein Wilhering. Nun han ich obgenanter Peter von Polhaim mit aller meiner vettern von Polhaim willen vnd gunst dem erbierdigen geistleichen hern abpt Petern ze Wilhering vnd dem conuentt daselbs di obgeschriben hub mit allem ierem zugehorn lauterlich durich Got geaygent zu ierem goczhaws daselbs ze Wilhering ewichleich da pey ze beleiben vnd inn ze haben alz ander ieren aygnew gut durich vnser vnd aller vnser varvardern sel hayl willen. Mit vrchund dez gengbürtigen priefs, den ich obgenanter Peter von Polhaim dar vber gib zu einem warn vrchund versigelt mit meim aygen anhangunden jnsigel vnd zu einer pessern sicherhait vnd czeugnuzz versigelt mit meiner lieben vettern hern Weycharcz vnd hern Anndres von Polhaim anhangunden jnsigel. Der prief ist geben nach Christes gepurd drewtzehen hundert jar darnach in dem vier vnd achczkisten iar des nechsten Montags nach sand Georigen tag.

Source Fulltext: OÖUB 10 (Wien 1933) S. 250-251