Ich Jacob Zymmermaister, dieczeit gesessen hinder dem goczhaws ze Wilhering an der Newen Mül dapey, vergich für mich vnd mein hawsfrawn vnd all vnser eribenn vnd tun chund allen lewten, dy den brief sechent oder hörnt lesen, vnuerschaydenleich mitsampt meinem pruder, das wir vns verczeychen vnd sagen ledig das gotzhaws ze Wilhering aller vnserr ansprach vnd aribayt, dy wir jndert dem goczhaws haben oder hieten getan huncz auf den hewtigen tag vnd auch sunder gelegt hieten auf dy selb Newen Mül, es sey mit leib oder mit guet mit erhebung nach der herren hilf vnd rat aus dem grunt vnd von newen dingen ze braytten stiften vnd fuer pringen, als lang vnd als verr hunczend her auf disen tag mit allem vnd zu der stat gehört, wie so das genant ist, auzgenomen alle vnser varunde hab, es sey gwant zewg viech trayd hey grüernad chüe vnd das ledig holcz nicht angenagelt; was des andern wer, des verczeyhen wir vns alles vnd gebens auf ledichleich dem goczhaws vnd den herren ze Wilhering furbas darnach nymermer ze sprechen weder mit recht noch an recht, vnd das luben wir als stet ze haben mit vnsern trewn angeuär, was oben begriffen vnd geschriben ist an dem brief, wenn sy in solicher mas mit vns getaydigt vnd gehandelt habent, noch allem vnserm willen vnd geuallen. Darüber zw einem warn vrchund vnd czewgnuss der warhait geben wir jn den brieff versigelten mit der erbern Bernhartten des Hager dy czeit markcht richter zu Otenshaym vnd Hansens von der Aschach vnd Albans des Ruedlinger die czeit phleger ze Chürnwerchk anhangunden jnsigeln, jn allen an schaden, dy wir darumb vleizzichleich gepeten haben, vnder dew wir vns verpinden mit ganczen trewn, wenn wir selben nicht aygen jnsigel haben. Der brief ist geben nach Christi geburd vber drewczehen hundert jar vnd darnach in dem acht vnd achczkistem jar an des heyligen Chrewcz tag, als es erhaht ward.

Source Fulltext: OÖUB 10 (Wien 1933) S. 513-514