Ich Gundakcher von Starhemberg bekenn mit dem brief fuer mich und mein erben,/ das fuer mich kamb der erber Michel der Oberhaimer, phleger ze Wessenberg/ und gab mir zu erkennen, wie er die zwaytail zehents auf dem hof zu Cherspawm/ mit seiner zuegehorung gelegen in Greimhartsteter pfarr meiner lehenschaft zẅ/ derselben kirichen ze Greimhartsteten zu ainem jartag geben wolt durich/ sein und seiner vorvadern sel willen und pat mich diemuetichleich, das ich dar-/ zu meinen willen geb, das ich also durich seiner vleissigen pet willen getan hab,/ doch insolcher beschaiden, das der zechmaister, der yetz bey der vorigen kirichen zech-/ maister ist, oder wer der ye hin fur kunftichleich wirt den obgenanten zehent mit/ seiner zuegehorung von mir und mein erben in lehensweis emphahen sol als/ oft sich das zu schulden fwegt; wir sullen auch ainen yeden zechmaister, wer der/ ye ist oder hin fuer kunftichleich pey der vorgenanten kirichen zechmaister wirt/ den obgenanten zehent mit seiner zuegehorung an alle vadrung und widered leihen/ mit urkunt des briefs besiglt mit meinem anhangunden insigl, doch mir und/ mein erben an unser lehenschaft unvergriffenleich und an allen schaden. Geben/ ze Riedekg an sand margreten tag nach christi gepurd vierzehen hundert/ jar und im achtzehnten jare.