Ich Hanns Kressling von Rudalffing vergich fur mich und all mein erben und tün kund offenleich mit dem brieff allen leẅten, die/ den brief ansehent, lesent oder hornt lesen, das mich die erwirdigen geistleichen, mein gnädigen lieb herren, herr abbt Jacob zẅ Wilhering/ und der gantz conventt daselbs habent ausgericht und beczalt aller geltschuld, dy sy mir von geliechem güt und rayttung wegenn/ schuldig waren, der ich seẅ wissentleich mit krafts des brief gantz ledig und mu/essig sag ungeverleich; dann von meiner diennst/ wegen, die ich in und irem gotzhaẅs hab ye getan, dawider habent sy mir von iren gnaden ain herren pfrünt geben mein lebtag/ in irem gotzhaẅs zü Wilhering dieselbig zu nüczen und niessen, als dann der prief lawt und sagt, den ich von in darumb hab. Es/ ist auch ze mercken, das ich vorgenant Hanns Kressling recht und redleich und mit wolbedachtem müt zu der zeit und ich es mit rechtt/ wol getün möchte und nach ratt frumer weyser lewt und von vodrung und züsprüch wegen hab ich in und irem gotzhaẅs dy treẅ/ hinwider getan mit guter gewissen, was ich von varundem gut hab und lass in, irem gotzhaẅs und auf des gotzhawss gruntten/ unvertüens und mit güter zeugnüss nicht verschafft wurd von mir, es wêrn geltbrieff, berayts gelt, pett, pettgwanntt, rock/ und anderlay varund güt, wie das genannt und gestallt war, wissund und unwissund, das sol nach meinem tod ledichleich an chrieg/ fur all mein erben und aller menichleich in und irem benanten gotzhaẅs beleiben an allen abprüch, mir und meinen vorvodern sa/eligen/ zu ainem seelgrët, und mügen auch mit demselben güt allen schaffen tün und lassen, als in das am pesten fügt an als gevar; und/ was ich, all mein erben oder ander yemant von unsern wegen von den vorgeschriben sachen, puntten und artikeln und von anderr/ vodrung und züsprüch wegen, die dy sach berürentt, die wir mochten oder wolten haben hinfür dawider mit in und irem gotzhaws/ und des gotzhaẅss lewt und güt an erhüeben mit kriegen rechten, geistleichem oder werltleichem oder an recht, das haben wir an/ aller stat verlorn und sy gantz behabt und gewünnen ungeverleich; und das in das also stet und unczebrochen beleib, dar uber/ gib ich vorgenant Hanns Kressling fur mich und all mein erben in und irem benanten gotzhaẅs ze Wilhering den brief versigelten mitt/ meinem anhangunden insigel und mit der erbern Wolfgang des Atzpekchen, dieczeit pfleger zu Kurnbergk und Dietreich des/ Tewrwanger, payder anhangunder insigel, dy sy zu merer zeẅgnüss und pesser sicherhait und durch meiner fleizziger pett willen/ an den brief habent gehanngen, in und iren erben an schaden, der geben ist nach kristi gepürd vierczehenhundert jar darnach/ indem neẅnczehendem jare an sand Thomans tag des heiligen zweliffpoten.