Ich Oswald Ludmanstorffer vergich fur mich und all mein erben und tun kund offenleich mit dem brief allen leuten, yetzund lebentigen und hernach/ kunftigen, die den brief sehent oder hornt lesen, daz ich mit wolbedachtem muet, mit gunst meiner lieben muter Margrethen, Stepphan des Ludmanstorffer/ saligen wittib und noch rat meiner nachsten und pessten freunt zu der czeit, do ich das mit recht wolgethun macht, recht und redleich verkaufft und/ zukauffen geben hab und gib auch wissentleich mit dem brief dem erwirdigen geistleichen herren herrn Ulrichen. Abbt zu Wilhering, dem ganczen/ convent doselbs und allen iren nachkomen meinen hof genant der Oberhoff zu Hitczing in sand Ulreichs pharr gelegen und ain lehen zu Schaubfreyling/ in Kirchberger pfarr, baide gelegen in Schawnberger herschaft, das alles unser rechts freis aigen ist; den vorbenanten hoff und lehen hab ich dem/ vorbenanten abbt Ulreichen, dem ganczen convent doselbs und iren nachkomen mit allen wurden, […] eren, rechten, nuczen, gulten und zugehorungen,/ so darczu gehorent und davon bechomen mugen, gestifft und ungestifft, besuecht und unbesuecht, nichts aus darinn genomen recht und redleich/ verkaufft und ze kauffen geben [umb ain sum gelts], der wir von in gancz und gar ausgericht und bezalt sein zu rechten tagen an all schaden; ich hab/ in auch den obgenanten hoff und lehen [eingeantburt] und ubergeben aus meiner nucz und gwer in ir nucz und gwer, also das sy und all ir nachkomen/ allen iren frumen damit handeln und schaffen sullen und mugen mit verkauffen, verseczen, geben, schaffen machen, wem sy wellen […] unserer erben und/ menickleichs von unsern wegen irrung und hindernuss angeverd; wir und unser erben sullen und wellen auch des vorbenanten hoff und lehen mit aller/ zugehorung [ganze Zeile durch Bug abgeschnitten] [...] recht ist in dem land ob der Enns/ [Zeile durch Bug abgeschnitten] […] icht ab oder das in krieg oder ansprach daran auferstuend mit dem rechten von […] oder von wem das wer von unsern/ wegen, das sullen und wellen wir [in genczleich] ausrichten und recht machen und wider keren an all ir mue und schaden; tetten wir aber des nicht, was sy/ dann des schaden nemen, denselben schaden mit sambt dem obgenanten kauff sol der obgenant abbt Ulreich und das gancz convent doselbs und all/ ir nachkomen haben und bekomen zu uns uns unsern erben und darczu auf aller unser hab, es sey [anligunt oder varund] guet, daz wir yczund haben oder/ hinfur gewinnen und hinder uns lassen, es sey inner lands oder ausser lands, auf wasser oder auf lanndt, darinn nichts ausgenommen angeverdt, mit/ urkund des briefs, den ich obgenanter Oswaldt Ludmanstorffer fur mich und all mein erben gib dem obgenanten abbt Ulreich von Wilhering, dem/ ganczen convent daselbs und irem gotzhaws doselbs und allen iren nachkomen, besigelt mit meinem aigen anhangunden insigel und zu ainer/ geczeugnuss habe ich vleiczz gepeten die edlen Hannsen den Obernhaimer, anbalt zu Lynncz und Dankharten den Herleinsperger und Sigharten den/ Grueber und meinen lieben vetter Sigmunden den Eyczinger mit iren anhangunden insigeln, dy ich vleiczikleich darumb gepeten hab, in und iren/ erben an schaden. Der brief ist geben als man czallt nach cristi gepuerd virczehenhundert jar und darnach in dem funfunddreissigistem jare an/ sand Jorigen tag des heiligen martrer.