Ich Thaman Stettner auf der Stettenhüb zu Strashaim hinder dem erwirdigen gotzhaws ze Wilhering gesessen vergich fur mich,/ mein hawsfrawn und all unser erben und tün kund offenleich mit dem brief allen den, den er furkumbt sehent, horent oder lesent. Als/ wir uns von dem erwirdigen geistleichen herren herrn Vlreich, abbt ze Wilhering von der egenannten hub wegen abgeschaiden und von in/ getaydingt haben, dew des yetzgenanten abbts und seins gotzhaws freis aygen ist, dew selben hub Fridreich Phanczagl aufm Wagram und ander/ sein frewt als gerhaben und gelter in genomen haben wie das alles gestalt ist an gevar, davon ich dann gancz und gar entricht/ worden pin an all schäden, da durich ich versprich und gelob mit meinen trewn wissenleich mit dem brief, das ich, mein hawsfraw, all/ unser erben, noch nyemant ander von unseren wegen hincz dem egenanten abbt und seinem gotzhaws und all iren lewten und/ auch hincz dem egenanten Phanczagl und allen den, dy mit der egenanten hüb verdacht sein, nyembt ausgenomen ungevärleich nunfur-/ baser kaynerlay zuspruch noch ansprach ewichleich nymermer nichts zusprechen schullen noch enmugen gehaben, wenig noch/ vil, weder mit geistleichem noch werdleichem rechten chays wegs angevär. Wer aber, das ich, mein hawsfraw, unser erben oder/ ander yembt von unseren wegen dy obverschriben sach nicht genczleich stët hilten und in ainen oder mënigeren dawider tätten,/ so sein wir oder wer das von unseren wegen tätte dem wolgeporen herren Graff Johansen, grave ze Schawnberg unserem gnädigen/ herren oder sein erben XXXII phunt phennig und dem obgenanten gotzhaus fu/enf phunt und dem benanten Phanczagl aller seiner/ schäden und czusruch zu pen an alle gnad vervallen. Des zu urkund hab ich egenant Thaman den brief geben, besigilten durich/ meiner vleizziger pet willen mit der erbern und weysen Paulsen Wolfslukchner und Wolfgangen von Hilkering, richter im/ Aschachwinchl, payder furgedruchkten insigillen, in und iren erben an schäden. Der gepet umb dy insigil sind zeugen dy erbern und/ peschaiden Niklas Waldner, purger zu Otenshaym, Chucz Weber zu Strashaym, Wolfl Hekchel und Niclas Hubner daselbs; unter/ dy insigel und zeugnuss ich vorgenanter Thaman Stettner fur mich, mein hawsfrawn und all unser erben mit mein trewen/ in aydes weyse stëtichleich verpindt, alles das stët zehalten, das an dem brief verschriben ist. Geben nach christi gepurd vierczehen/ hundert jar und darnach in dem sechs und treissigisten jare an sand Katherini tag.