Wir abbt Vlreich zue Wilhering und der gancz convent daselbs bekennen fuer uns und für all unser nachkomen/ und tün kund offenleich mit dem brief allen den, die in ansehent oder horent lesen, das wir mit wolbedachten muet und guetem/ willen recht und redleich kauffleich ze kauffen geben haben Paulein dem Lechner, Dorothea seiner hausfrawn und allen/ iren paiden eriben ain kaufrecht auf unserem guet genant das lehen zue Schaubfreiling in Kirichperiger pharr und Scha-/ wnberger herschaft gelegen umb ain gelt, des wir von in gancz und gar gericht und beczalt wurden sein zu rechten tegen an/ allen schaden. Also insolicher beschaiden das sew uns von dem vorgenanten lehen alle jar jërlich raichen und diennen sullen/ ze unser frawntag zu der diennstzeit vier und zwainczkch meczen korn und vier und zwainczkch meczen habern alles linczer/ masse und funf schilling und zwainczkch phennig alter wienner phennig fur allen hanndt diennst und zwelif kes, der/ sol yder zwayer phennig wert sein und drey schilling wienner phennig ze stewr und nicht mer, dew sol man geben zu sand/ Andres tag mit den hanndt diennst phennig; sy sullen auch das obgenant lehen ze haws, ze hof, ze holcz, ze veld pauleich/ und stiftleich haldten und legen und inne haben, das wir unsers diennsts davon wol bekomen mügen; wir sein auch des/ kaufrechts auf dem ycz und gemelten lehen, seiner zuegehorung ir rechter herr, scherm und gwer wo oder wann in des nott/ und turft geschiecht also kaufrechts und lanndes ob der Enns recht ist, wann auch das ist, das sew das vorgenant lehen nicht/ lengër wellent oder mügent inne haben, so mugen sy ire recht auf dem egemelten lehen verseczen, verkauffen, wemb/ si wellent, ierem genossen und wemb si das vorgenant kaufrecht auf dem egenanten lehen ze kauffen geben, der selb sol alle/ die recht haben als sew die selb gehabt habent und als offt ain wandlung geschiecht auf dem obgenanten lehen, es/ sey mit dem tod, mit verseczen, mit verkauffen oder wie es sich füeget, so sol uns der abfert geben zwelif alter wienner/ phennig und der aufvert auch als vil und des zu urkund geben wir in den brieff besiglten mit unserem und unsers con-/ vents unser paider anhangunden insigl, der geben ist nach der pürd kristi im vierczehenhundertisten und acht und/ dreissigisten jaren an mitichen vor sand Valentyn tag des heiligen martrer.