Ich Thoman Furo/eder und ich Anna, sein hausfraw vergehen fur uns und fur all unser eriben und nachkomen und tuen kund mit/ dem offenn brief allen den, die in sehent, hornt oder lesent, das wir nach unser frewnt rat auch czu den czeiten, da wir es rechtleich/ wol getuen mochten, recht und redleich geben, geschaft und gemacht haben, geben, schaffen und machen auch wissenlich in kraft des briefs dem erwirdigen/ gotzhaus des heiligen sannd Larenczen czu Gr/eamesteten in das czechschrein zu einem ewigen jartag und czu geda/echtnuss unsers lieben sweher und/ vater Wernharts, des allten Furöder und Margrethen, weilent seiner hausfrawn paider saliger gedachtnuss und unsern vorvadern und nachkomen/ und allen gelaubigen seln czu hillf und czu trost, unsern akcher genant der Kaufman akcher, der rechts freys aigen ist und ligt pey dem hof an der wys/ in Grämesteter pfarr und in Wächsenberger lanntgericht; es leit auch von allter ain zins auf dem benanten akcher zu dem egenanten goczhaws/ zu Grämesteten in daz czechschrein czwainczigk pfennig und funf pfennig gein Wilhering in das Chloster, alles landes werumb czu unser frawntag/ der dienst czeit und nicht mer, die zway jar nach ein ander wann er mit traid gepawt ist, aber am dritten jar so geit man davon nichts; den/ vorgenantten akcher und das wismad, das von allter auch darczue gehört, haben wir mit allen ern, rechten, nuczen, gulten, dienst und gesuechen, alls/ von allter herkomen ist dem egemelten goczhaus zu Grämesteten in das zechschrein und den zechlawten daselbs ubergeben und eingeantburt mit/ dem gegenburtigen brief und bestätt mit herren hannt und aller stät, der sew zu recht daruber bedurffen auch mit sambt dem kaufbrief, den/ wir von Hannsen dem Luerär darumb haben aus unser und aller unser eriben nucz und gewer in des goczhauss und der zechläwt nucz und gwer/ in solcher mass und beschaiden, das wir und unser eriben und frewnt den obgenanten akcher und daz wismad mit aller zugehorung sullen und wellen inn/ haben, nuczen und nyessen, so wir pest und maist mogen; doch also das wir dem egenanten goczhaus zu Grämesteten und den zechlawten daselbs in das zech-/ schrein all jar ierleich davon raichen und dienn sullen und wellen sibenczigk pfennig lanndes werumb zu Osterreich ob der Enns zu unser frawntag/ zu rechter dienstczeit mit sambt den vorgemelten czwainczigk pfennig, die daz benant goczhaws dar auf hat und mit sambt den obgeschriben funf pfennig, die/ daz kloster Wilhering darauff hat, das [alles] mit ainer ganczen summ allso macht drey schiling und funf pfennig jerlicher güllt; so sullen die egemelten/ zechlawt, wer die sind auch alliar ierleich zu unser frawntag der dienst czeit davon ausgeben, raichen und dienn ainem pfarrer oder vicari zu/ Grämesteten, wer der ist oder kunftig wirt, ffunfczigk pfennig der benanten landes werumb, der schol dann darumb pegen und volbringen den obgemelten/ ierleichen iartag albeg in der ersten vastwochen anverczihen mit ainer gesungen vigili und mit ainem gesungen selampt und mit ainer gesprochen/ mess, und schol auch von den ffunfczig pfennig geben und ausrichten ainem gesellen segs pfennig von der vigili und dem mesner vier pfennig,/ und sol all suntag auf der chanczl pitten umb des benantten Wernharten Furoder und Margrethen, seiner hausfrawn salig sel und umb all gelaubig/ sel und all, die aus unserm geschla/echt seinn verschaiden und den allen mit ein ander frumen ein czwains gepet und sullen die zechla/eut zum gocz-/ dienst zwo kerzen dar leihen, die pey der par prynnen; auch dem chloster czu Wilhering voraus dienn und raichen ffunf pfennig an allen abgangk, alls/ vor gemelt und von allter herkomen ist und dann das ubrig gellt sol ierleich dem obgenantten goczhaus ze Gremesteten beleiben und zu nucz und/ notturften angelegt werden; und wann wir und unser eriben oder nachkomen die benanten grunt nicht lenger wolten oder mochten inne gehaben/ oder mit tod abgingen, oder das wir den obgeschriben dienst also verczugen und zu der dienst czeit nicht gaben oder das wir die grunt nicht stiftlich/ inne hielten, dann so sullen und mogen sich die zechlawt der grunt selb wol under winden und dem goczhaus zu nucz in ziehen, nuczen und nyessen, stiften/ und storn und damit tuen und lassen wie sew verlust an all unser irrung und widerred; war auch, das ein pfarrer oder vicari oder die zechlawt darinn/ sewmig warn und den goczdienst verczugen und also nicht ausrichteten, als vor gemelt ist, so mugen wir oder unser eriben oder die pfarrlawt ob wir nicht enbarn/ die benanten grunt in cziehen und den egemelten goczdienst allen davon ausrichten pey einer andern kirchen, wo uns das fugleich wär alls lang und sovil,/ uncz das der goczdienst also gancz ausgericht und die versawmbnuss, die beschehen war, ersta/ett wurde an allen abgang angevar; ich obgenanter Thoman/ Furoder, mein hausfraw und all unser eriben seinn auch des akchers und des wismad mit aller zugehorung in obverschribmer maynung des goczhawss und/ der zechläwt recht trew gewern und furstandt fur all rechtlich ansprach, alls gewerschaft solchs gemachts und freys aigen recht ist im lannt zu Oster-/ reich ob der Enns. Ging in aber daran icht ab mit dem rechten, des sy zu schaden kamen, die sullen und wellen wir in gancz ausrichten und widerkern/ und sullen das alles haben und bekomen dacz uns und unsern eriben und dacz unsern trewn, darczue auf aller unser hab, wo wir die uberal indert haben, gebingen und/ hinder uns lassen, im lant oder ausser landes, nichts ausgenomen angevar; mit urkund des briefs versiglt und besta/ett mit des edeln und vesten Walthasarn/ des Schallenberger zu Wächsenbergk und mit des edeln Erharten des Haberstorffer, die czeit pfleger daselbs, paider aigen anhangunden innsigl, die ich egenantter/ Thoman Füroder paid mit vleizz darumb gepeten hab, in und irn eriben anschaden, und dem chloster zu Wilhering an dem vorgemelten gewondlichem diennst unvergrif-/ fenleich. Der brief ist geben an sannd Blasen tag alls man czalt nach christi gepurdt vierczehen hundert jar und darnach inn dem ains und funfczigisten jare.