Wir Ludwig von gotes gnaden pfallenczgrave bey Rein und herczoge in Nydern und Obern Bayrn bekennen mit dem brief/ offennlichen, daz fur uns komen sind der wirdig in gote, dy andechtigen unssunderlieb, der abtt und convent des gotzhauss/ zw Wilhering, sannd Pernhartz ordens, und haben uns fu/erbracht solh gnad gab brief und freyhait, so in von unsern vordern/ herczog Otten von Bayern loblicher gedachtnuss geben und darnach durch annder fursten am hawss von Bayern, unsern vordern/ aller lo/eblicher gedachtnuss besta/ett und confirmirt sein, nämlichen daz sy ain pfunt salcz weits panncz an unsern mautt-/ steten Burghausen und Schardingen ainsten im iar zol und mauttfrey fuern sullen und mogen und uns underteniglich/ angerufft und gebeten in solh unser vordern gnad gab brief und freyhait gnadiklich zubesta/etten und confirmiren; solh ir/ bete und furdrung des gotzdinste wir angesehen und in solh gnad gab brief und freyhait, wie dy von wort zu wort lautten/ umb dy egenanten anczal salcz gnadiklich bestatt und confirmirt haben, bestatten und confirmiren in dy auch wissenlich in/ kraft des briefs, nämlich daz sy oder wem sy daz verlassen ainsten alle jar järlich an unsern mauttsteten Burghausen und Schardingen zol und mauttfrey furen oder furen lassen mogen ain pfunt salcz weits pannts; doch also, das sy daz zw ge-/ wondlichen zeiten als von allterherkomen ist furen und unsern vordern uns und unsern nachkomen den jartag in denselben/ brifen begriffen jarlichen halten und begeen lassen sullen, als vor und von allter herkomen ist, und gebieten darauf allen unsern/ pflegern, lanndtschreibern, ambtlawten, richtern, zollnern, mauttnern, schergen und allen andern unsern undertan und getreun/ gegenburtigen und kunftigen, ernstlich und vesstiklich mit dem brief den egenanten abtt und convent bey solhen unsern/ und unsern vordern gnaden brifen freyhaiten und alltem herkomen zehalten, handthaben, schuczen und schermen und dawider/ nit tun noch anndern zutun gestatten bey unser swarer straff und ungnad zuvermeyden, des zu urkund geben wir an den/ brif mit unserm anhangundem in sigel versigelt zw [Landshut] an montag des heiligen krewcz tag invencon nach/ christi gepurde vierczehenhundert und im ains und funfczigistem jaren.