Ich Maricz Newndlinger bekenn fwr mich und all mein eriben und tu/en kund aller menigkleich mit dem offen brief, das ich nach ratt und/ wissen meiner brueder und ander meiner nagsten und pesten frewnt zw der zeitt, da ich das woll getun macht, recht und redleich/ ledigkleichenn verkauft und kaufleichen zw kauffen geben hab dem erbern weissen dem richtter, dem ratt und der ganczen gemain/ des markchs zw Attenshaim und Mertten dem A/estner, dieczeitt in haber unsser lieben frawn frwemess da selbs und allen iren/ nach komen, die unsser lieben frawn frwemess bestiftten wellen, meinew zway guetter, ains genant zw Wigersperig, das dann/ gelegen ist in sanndt Mertteins pfarr und indem lanndt gericht Wassenberg und dient jarleich zw unsser frawntag der dinstczeitt/ ain pfund pfennig lanndes werung und das guet zw Ratmansdorff pey der Aich gelegen in sannd Veitz pfarr und indem ob-/ genantten landt gericht Wassenberg mit ierr waider czuegehorung, das nichtz ausgenomen das da dient sivm schilling und/ sechs pfennig zw der benantten unsser frawntag, die obgenantten zway guetter dann mein rechtz freizz aigen sint gewessen/ umb ain swm gelcz, die sy mir weraitt ausgericht und weczallt habent czw rechtten ta/egen und an all mein schaden: darumb/ ich in der obgenantten guetter paider abgetuen und ingeanttwurtt hab aus mein und aller meiner eriben nucz und gewer in ir und/ aller irer nachkomen czw der egemelten frwemess nucz und gewer mit allen den eren, rechten, nuczen, gultten und dinsten, so darczue gehortt,/ davon wekomen mugen ze haws, ze hoff, holcz, veld, waid, wasser oder wismadt, des nichtz ausgenomen, alls ich es dann ingehabt,/ herbracht und genossen hab und von altter hercho/amen sind ungeverleich, und tuen awch awch des genczleich czw fwercticht in/ krafft des brieffs, alsso das ich und all mein eriben noch ander niemancz von unssern wegen kain zuespruch noch vaderung da enge-/ gen schullen noch wellen haben weder mit recht noch anrecht, geistleich noch weltleichem rechtten, in chainerlay weizz angever; und/ sew mugen awch nwn fẅrbasser nach allem yrrm willen da mit hanndell, mit verseczen, verkauffen, stifftten, schaffen machen und geben,/ wem sy wellent nach allem yerm gevallen an mein und aller meiner eriben und manigkleichs von unssern wegen yrrung, hindernuss/ und widerred angever; Ich obgenantter Maricz der Newndlinger und all mein eriben seczen uns awch der egenantten czwayer guetter/ Wigersperig und Ratmansdorff mit aller irr baider czuegehorung czw kauff jar rechtten gewern und fwerstant fwr all rechtleich/ ansprach, wann und wo indes mit dem rechtten nott und durfft geschiecht, alls dan solichs kaufs freizz aigens guecz in lanndt ob/ der Enns recht ist. Ging in awer oder irn nachkomen ansolicher gewerschafft mit recht icht aw, alsso das in krieg, yrrung oder/ in vell darumb auferstuendt, von wem das war oder wie sich das fueget, des sew zw schaden ke/amen, den selbigen schaden und abg[angk]/ czw sambt dem haubtguet schullen und wellen wier in genczleich erstat[en], ausrichtten und widerchern an all ir mue und […]/ […] schullen sew das alles haben czw mir unverschaidenleich czw allen meinrn eribrn und darczue auf allem unsserm guet [so wir uberall]/ indert haben, es sey im lanndt oder ausser lannd, auf wasser oder auff lannd oder wo wier das haben, gewingen oder [hinder uns lassen],/ [dez] nichtz ausgenomen, des mugen sew sich woll under winden und alsso lang inne [haben] unczt sew abgankch und aller ierr schaden/ davon bechoment alls sy nagst und pest mugent; das ist alles unsser guetleich will und wartt, wier sein lembtig oder tod treuleich/ und ungeverleich, des zw urkundt der warrhaitt gib ich inden offen brieff wesigellt mit meinem obgenantten Mariczen des Newnd-/ linger aigen anhangunden insigll und zw pesser sicherhaitt und zeugnus willen so hab ich darczwe gepetten mit vleizz die/ edelln und vesten meinenn lieben prueder Kasparen den Newndlinger und mein lieben frewnt Reich von den Walich, das sew/ irr insigell czw zeugnus anden brieff gehangen habent, doch in paiden und allen irren eriben anschaden. Gewen nach christii/ gepuertt vierczechen hwndert jar und darnach in dem zway und fwmczigisten jare des mitichens vorr sannd johanns tag/ ze swnibentten.