Wir Sigmund graf zu Schawnbergk etc. bekennen mit dem brief von irrung wegen, die gewesen sind zwischen des erwirdigen geistlichen/ unnsers besunderlieben Ulreichs abbt und den convents unnserr stifft und vogttei ze Wilhering an ainem, und Wolfganngen/ Pawngarttner zu Purwerd des anndern tails, von des hofs wegen zu Talhaim, darauf dem obgenanten Wolfgangen Pawngarttner,/ sein erere hausfraw Barbara auf irer gerechtikayt, die sy darauf hat gehabt ain verschreibung gegeben und ain gma/echt getan hat,/ als das der gemechtsbrief ausweist, awch von scheden wegen dahinder derselben Wolfganng der sachen halben komen sol sein, darumb dann/ der benant Wolfganng gegen dem bemelten abbt und sein anwe/allden lanng in klag und rechtten gestannden ist; awch von spruch wegen,/ die der benannt abbt zu dem berurten Wolfganngen widerumb awch vermaint zu haben, derselben irer Irrung sew der baiderseytt/ zeentschaiden willigilich hinder unns komen und geganngen seien, also das wir die gnetikayt fur unns nehmen, und versuhen, ob wir sew/ mit irem wissen abgeschaiden mochtten; ob des aber nicht genolgen kund, das wir dann erinderseczen und recht zwischen ir erkennen/ und sprechen lassen, als dann das ir hindergengbrief, unns gegeben aygenlich innehallden; nw haben wir angesehen, das sew/ merer mue, zerung und scheden vertragen werden und sew mit unnserm spruch abgeschaiden in mass, alls hernach begriffen ist/ am ersten sprechen wir ob sich icht unwillen zwischen ir begeben hiet mit wortten oder werhen, das der aller und gennczlich ab/ sein sol ungeverlich, und der obgenant Wolfganng sol dem obbenanten abbt Ulreichen antwurtten den gemechtbrief unnd ver-/ schreibung, die er von seiner vodern hausfrawen Barbara gehabt hat nach dato des gegenwurttigen unsers spruchs inner vier-/ zehen tagen, daentgegen der offtgenant abbt Ulreich dem dikgenanten Wolfganngen antwurtten und geben sol zu den funfczehen/ pfund pfennig, die im derselb abbt gelihen und mit aim geltbrief darumb versorgt ist, siben und zwainczigk pfund pfennig gemayner/ lanndgebiger munss, das allso in ainer sum zwai und virczigk pfund pfennig bringet, damit all vorgemelt sachen zwischen ir ganncz/ abgeschaiden und geaint sein sullen ungeverlich; welher tail aber des gegenwurttigen unnsers spruchs nicht stet hielde und brache in aim/ artikel oder mer, der ist dem anndern taill aller seiner zuespruch und unns und unsern lieben brudern hundert pfund pfennig an alle/ gnad vervallen und unns der schulldig darnach inner dem nechsten moned zeentrichtten awch angever. Mit urkundt des gegenwurttigen/ unsers spruchbriefs, des wir yedem taill ain gleichlawttenden gegeben haben under unserm aufgedrukchten insigil doch unns, unsern/ lieben brudern und unsern erben anschaden, der geben ist an dem nechsten eritag nach sannd Giligen tag nach kristi/ geburd virczehenhundert und darnach in dem funfundfunfczigisten jare.