Ich Steffan Ubler, die zeit im Mulpach gesessen, bekenn fur mich und all mein erben und tun kund/ offenleich mit dem brief allen, den er furkumbt sehent, horent oder lesent, das ich recht und redleich/ gemacht und geben hab, mach und gib auch wissenleich mit dem brief meiner eeleichen lieben hawsfrawn/ Katherina, Hannsen des Holczpawner zu Perkchhaim saligen tochtter mein gerechtichait, so ich hab auf/ dem gut im Mulpach gelegen genant Offenhawsen in Schonheringer pfarr im landtgericht im Tunawtal,/ und ist des erwirdigen gotshaws Wilhering freis aigen, darczu all mein hab und gut, so ich uberal indert/ hab, gewing, eraribent und hinder mein lass, varund oder anligkund gut, wie das genant und gehaissen/ ist, es sey wenig oder vil, nichts darinn ausgenomen sunder genczleich hie inne beslossen, alles ledigkleich zu/ verloren gut in solicher beschaiden mit ausgenomen und beredten wortten, ob beschach, das ich obgenantter/ Steffan mit tod abgieng und erstarb vor meiner benantten hawsfrwan Katherina, da got lang vor sey, dann/ so sol und mag sy nach meinem tod und abgangk mit aller vorgemeltter hab und gut allen iren nucz und/ frumen besuechen und betrachtten durich verschaffen vermachen und geben, wem sy will und damit tun/ und handeln, wie sey des verlust und gut zymbt an wider sprechen, irrung und hindernuss aller irrewr frawnt/ und manigkleich von iren wegen angever; liesse ich aber leiberiben, dy wir miteinander hietten und gewunen/ der uns got nicht […] diselben unser baider kinder sullen durich unser baider tail frawntschafft von/ solicher obgemeltter hab und gut treuleich benant und furgesehen werden, treuleich und ungeverleich;/ geschech aber, das dy benant mein hawsfraw Katherina mit tod abgieng und ersturb ee, wann ich obge-/ nantter Steffan, ir man, da got auch lang vor sey dann nach irm tod und abgangk, so ist mir das gegen-/ wurttig gemacht alles und was sy mit guts zugebracht hat auch widerumb ledig worden und in mein/ gewalt sein vervallen, und ich mag auch damit allen meinen nucz und frumen besuechen und betrachten/ durich verschaffen vermachen und geben, wem ich will und damit handeln und tun, wie mich der verlust/ und gut zymbt an aller irer frawnt und manigkleich von iren wegen einsprechen, irrung und hinder-/ nuss; ich sol auch diselben unser baider kinder treuleich fur sehen und bewaren, als ain vater tun sol an gever;/ geschach aber, das wir obgenantte baide mit tod abgiengen und nicht leiberiben hinder unser liessen, dann/ so sol solich obgemelt gut und was wir ungeverleich hinder unser lassen, halbs eriben und gevallen auf/ meiner hawsfrawen nachst eriben und frawnt und auf mein nachst eriben und frawnt treulaich und/ ungeverleich; weren aber leiberiben verhandten dabey, sol solich gut behaben und des zu urkund gib/ ich ir den offen brief besigelten und wolbestatt mit der edeln und erbern Veytten Pokch zu Wilhering/ und Wolfgang Rawber, die zeit richtter zu Ottenshaim, ir baider anhangunden insigeln, dy ich obge-/ nantter Steffan vleissigkleich darumb gepeten haben, in baiden und allen iren eriben anschaden und/ unvergriffenleich dem erwirdigen gotzhaws Wilhering an seiner gerechtichait dienst und vodrung;/ darundter ich mich mit mein trewen in aides weis verpindt, allez das war und stätt zuhaltten, das oben/ an dem brief geschriben stet, der geben ist nach kristi gepurdt vierczehen hundert und in dem funf und/ funfczigissten jare an suntag vor dem heiligen auffarttag.