Ich Veytt Graf fur mich und an stat meiner swester Anna der Pognerin zu Lynncz, der briefleichen gwalt ich gehabt und fur/ die mich wissentlich angenomen hab, ich Hanns Graff und ich Barbara weilent Jobsten Griessteter burger zu Enns seligen witib,/ alle geswistrett bekennen fur uns, all unser erben und miterben und tun kund offennleich mit dem brief allen, den er furkumbt/ von aller der vodrung und zuspruch wegen, so wir gehabt haben hincz dem erwern, unserm lieben swager Symon dem Pilgreim,/ burger zu Enns umb den widersal, der nach innhaltung ains gemechts von seiner Margrethen, unserr swester seligen auf uns/ geerbt und gevallen ist, darumb wir uns mit dem benanten Symon Pilgreim und von aller annder hanndlung, zuspruch/ und sachen wegen, so wir zu im gehabt haben, darinn nynndert noch nichts ausgeczogen, sunder alles und gennczleich hieinne/ beslossen durich erwer lawt liepleich und frewntleich auf ain ganncz ennd betaydingt, verricht und geaynt haben, also das/ uns umb das alles ain sum gelts von im gesprochen worden ist, daran uns wolgenugt hat und auch uns und yedes be-/ sunder hinfur daran benugen lassen sullen und wellen, und seinn auch der von im gennczlich zu rechten tagen an allen/ abgabg und an schaden ausgericht und beczalt worden, darumb wir uns obgemelte geswistrett, ich Veytt Graf fur mich und/ an stat meiner swester Anna der Pognerin, ich Hanns Graf und ich Barbara Graesteterin fur uns all, unser erben und/ miterben hincz dem egenanten unserm swager Symon Pilgreim, allen seinn erben und gut, nichts ausgeczogen zu gannczer/ und steter furczicht getan haben und verczeihen uns auch recht und redleich wissentlich in kraft des gegenburttigen/ briefs in solher beschaiden und maynung, das wir vorgenante geswistrett unverschaidenleich all unser erben und mit-/ erben noch annder nyemants von unsern wegen von des obgemelten widersals noch von kaynerlay annder sachen und zue-/ spruch wegen, als oben gemelt ist, hincz dem egenanten Symon Pilgreim, allen seinn erben und gut kaynerlay vodrung,/ zuspruch noch gerechttigkait hinfur nymermer haben, noch gewingen sullen wellen noch mugen, weder mit recht noch/ an recht, noch in kaynerlay anndern weis hanndlung, alles trewlich und ungeverleich; wann der Symon Pilgreim und/ sein erben sullen und mugen mit allem irem anlikunden und varunden gut oder wem er das vermacht oder verschafft allen irn/ frum und nucz wolhanndeln verseczen, verkawffen machen schaffen und geben, wem sew wollenn und damit tun, wie sew verlust/ und am pesten gut zymbt an alle irrung und an widersprechen unserr vorgenanten geswistrett, aller unserr erben und/ miterben, frewnt und menigkleichs von unsern wegen angever; beschech aber, das wir, all unser erben und miterben oder/ annder yemants von unsern wegen darumb gen dem obgenanten Symon Pilgreim, allen sein erben und gut oder/ den, dy sein gut nach im innhaben und besiczen werdent furbas icht zesprechen oder ze erfodern anerhweben und erb-/ schafft oder gerechttigkait haben wollten, in welherlay maynung und von wem das wer oder wie sich das fugt und be-/ geb, es wer mit recht oder an recht und wo wir mit in darumb fur komen, das geben wir in an aller stat und am ersten/ furkomen recht gen uns erlangt und behabt und uns gen in unrecht und verlorn, und was sew des dann auch ynndert zu/ schaden kamen, kaynerlay schaden ausgenomen, den selben schaden sullen sew dann haben und bekomen zu uns, allen unsern/ erben und miterben und darczu auf allem unserm gut, und hab nichts ausgeczogen, wo sew darauf koment, so sew nachst/ und pest mugen an alle irrung und an widersprechen ungeverleich, mit urkund des briefs besigelt mit meinem obge-/ nanten Veytten Grafen aigem insigel, das ich fur mich selbs und an statt meiner obgenanten swester Anna der Pognerin,/ dafur ich auch oben hab angenomen an den brief gehangen hab, und der sachen zugeczewgnusk hab ich und mit sambt/ mein brueder Hanns Graf und Barbara Griessteterin mit vleis gepeten den erwern und weisen Veyten den Sewser,/ diezeit stattrichter zu Enns auch mit seinem anhangunden insigel, im und sein erben an schaden, und under baide in-/ sigel wir uns vorgenant, ich Hanns Graf und ich Barbara Griessteterin, sein swester fur uns all unser erben und mit-/ erben mit unsern trewn an aides statt verpinten, alles das war und stett zehalten, so an dem brief verschriebenn ist,/ wann ich yeczgenanter Hanns Graf dieczeit aigens insigel bey mir nicht gehabt hab. Geben an suntag vor sannd Stef-/ fans tag der erfindung nach kristi gepurd vierczehenhundert und im sechsundfunffczigkisten jare.