Wir Wilhalm von gotts gnaden abbt zu Wilhering und der ganncz convent daselbs, sannd Bernharts/ orden, Passawer bistums, bekennen fur uns, all unser nachkomen offenlichen mit dem brief aller/ manigklich den [er furkumbt] ze horen und zelesen, als weilent der ersam andachtig briester herr Wolf-/ ganng, pfarrer zu [Reichenaw] uns und unserm gotzhaws manigfeltig guttat, dienst und fuedrung aws/ genaigtter lieb […] gotzhaws und orden gehabt getan hat und seind kain guttat unbelonet sol bleiben/ betwingt uns, unser ge[wi]ssen solh guttat zu widerlegen und haben im dadurich ain ewigen jartag gestifftt/ und stifftten im den wissentlichen in krafft dez briefs, also das wir und unser nachkomen an eritag in/ den phingstfeyrtagen ains yeden jars ewigkleich des abents mit ainer gesungen vigili und des morgens am/ mitichen mit ainem gesungen selambt und mit vier prunenden kerczen nach unsers gotshaws syt und/ gewonhait; wer aber sachen, das der egenant jartag an den gemeltten tagen nicht volpracht mocht werden,/ dann das der volpracht wird in vierczehen tagen vor oder darnach ungeverlich und an welhem tag/ solher jartag wirdt [volpracht], dann sol des vorgenantten herrn Wolfganngs und des geslechts der marscha-/ lich [von] Reyhenaw [mit] dem gmain pet gedacht und umb sew gepeten werden und das solh styfft/ [ain ewigen] fur […] hab, geben wir dem edeln vesstten Jorigen, dem marschalh von Reyhenaw des dann/ [gestiffter pfarrer,] der egenannt herr Wolfganng saliger gewesen ist, disen stifftbrief besigeltten mit unser/ [und unsers] convents anhangunden insigeln, der geben ist nach kristi gepurd vierczehenhundert und in/ dem funfundsechczigistem jare an suntag nach aller heiligen tag.