Ich Toman Fu/ochsell, vasziecher zu Lynntz bekenn fur mich und all mein erben und tu/on ku/ond offenlich mit dem briff allen, den er fu/or-/ ku/ombt, das ich wolbedachtlich mit guetem willen und in der zeit, do ich das rechtlich wolgetu/on macht, recht und redlich verkaufft und zu kauffen geben/ hab Jacoben dem Vleischagkher, mitpurger zu Lynntz, Barbara seiner hausfrawen, meinem lieben aydem und tochter und iren baiden erben, mein haws/ und gartten darhinder gelegen ze Lynntz vor der statt auf dem grabem zwischen Hainreich des Zeungerl und Stephann des Vleischagker baider hewser und gertten/ mit seiner zuegehorung, do nicht mer aufleit wann jerlich zu sand jorgen tag unserm genedigen herrenn dem hertzogen ze Osterreich ainen wienner helb-/ ling ze purgkrecht; also hab ich inn das benantt haws und gartten darhinder und aller seiner zuegehorunng mitt allen den eren, rechten, nutzen und/ gulten, so allenthalben rechtlich darzue geho/ertt und davon bekomen mag, besuecht und unbesuecht, mit gantzer furtzicht in krafft des brieffs aws/ mein, aller meiner erben nutz und gewer in ir und aller irer erben nu/otz und gewer eingeanntwurtt mit gerichts hanndt und aller statt, der sy/ zu recht daruber bedorfften umb ain sum geltz, der ich von inn on schaden ausgericht und bezalt bin, dadurch sy nu/o fu/orbas allen iren frumen mit/ dem benanten haws und gartten und seiner zuegehorung woll mugen besuechen, das in haben, nutzen und nyessen, versetzen, verkauffen, schaffen/ machen und geben, wem sy wellend, damit hanndeln und tu/on als mit irem aignen guett, wie sy verlust on mein, aller meiner erben und/ manigklichs von unsern wegen irrung und hindernuss ongeverd. Ich obgenantter Toman Fuchsel und all mein erben sein auch des benantten haws und gartten/ mit seiner zuegehorung ze kchauff ir recht geweren und fuerstanndt fur all rechtlich onsprach, wo und wann in des mit dem rechten nott und durfft beschiecht,/ als dann solhs kauffs lanndes ze Osterreich purkrechts und der statt ze Lynntz recht ist. Gienng inn aber mit recht ynndert daran ab, des sy schaden/ nehmen, denselben schaden sullen und wellen wir in gantz ablegen und wider keren und sullen sy das haben und bekomen ze uns, unseren erben und/ auf allem unserm anligunden erb und varund guett, so wir uberall haben, gewinnen und hinder unser lassen, nindert noch nichts ausgenomen/ ongeverd; mit urkundt des brieffs besigelt mit der ersamen, weisen Hannsen Pechrer, die zeit stat richter zu Lynntz und Antonien Pechrer, des/ radts doselbs anhanngunden in sigell, die ich obgenanter Toman Fuchsell mit vleizz darumb gepetten hab zu bestattung und zeugnuss der sachen,/ doch in und iren erben on schaden; darunder ich mich fu/or mein erben mit meinen trewen verpindt, innhalt des brieffs war und statt zu halttenn./ Geben zu Lynntz ann sambstag vor reminiscere inder vasten nach cristi gepurdt vierzehenn hunndert und indem ach und sibentzigisten jaren.