Ich Lienhart Hildrer, burger zu Lanfeldn, bekenn offennleich mit dem gegnburtigen brief; alls von wegn/ ierrung und zwitracht etlicher czechennthalbm so sich haltet zwischn der czechlewt zu Gramanstetn an/ stat des gotzhaus daselbs ains tails und Steffan Schintler zu Newnkirchn an dem andern, pin ich ge-/ petten, nach dem ich vor etlichn jarn pei Sigmundn Steger, weilent pfleger zu Wachsenbergk und Wal-/ thesar Neindlinger, baider saligen gedachtnus mitsambt andern guetn lewtn ain taidingsman gewesn/ sei, mein kundschaft und zeugnus ze geben, was mir darumb wissentleich sei; darauf gib ich menigklich/ ze wissen, das Steffan Schintler hat eingenomen XXXVIII phunt pfennig, di maister Paulsen Czimerman saligen/ kindern zuegehort haben, und der er und Wolf im Amansslag [garhabn] gewesn sein der selbm suma/ gelts hat er den kindern nicht widerczegebn noch zubezalln gehabt, sunder geantwort er hab das/ gelt angelegt und hab von dem Neindlinger lehnschaft auf czehentten abgekauft, die nu sein aigen sein;/ da engegn haben di czechlewt sand Larentzn gotzhaus fuerbracht gschafftbrief lauttent von Lentzn Fueroder/ saligen, das di czechent dem gotzhaus sand Larentzn zuegehort habent, di pawmansrechten hindan geseczt/ di lehnschaft also hat der Schintler di lehnschaft und des Neindlinger gerechtikait auf den czehentten ge-/ habt und das gotzhaus di pawmansrechten hat Schintler vermaint di czechlewt sullen lechen von im nehmen,/ das aber di czechlewt nicht thuen habn wellen auf solichs sein Steger und Neindlinger zueinander gein/ Wachsenberg chomen den hanndl nach notdurften verhort und bricht gemacht in solicher mainung, das/ Neindlinger di lechen vom Schintler widerumb an sich genomen hat und sein di czechent dem gotzhaus/ zuegesprochen wordn und dem Steffan Schintler sein vom Neindlinger gesprochen X phunt pfennig, darfur hat/ das gotzhaus zuhilf gebn V phunt pfennig, also ist der hanndl gericht wordn und beredt das Schintler aller/ seiner gerechtikait und brief dem gotzhaws abtrettn und ubergebn sol und di czechlewt habent darauf/ di lehnschaft vom Neindlinger abkauft, darumb si brief und sigel haben, sovil pin ich Hildrer ingedenkh,/ das dem also sei das bekenn und schreib ich pei mein trewn und ern aides weis inkraft des briefs also und/ ain warhait zeschreibn ist nicht von lieb gunst hab noch neids sunder von der gotlichn warhait und gerech-/ tikait wegn an allen arglist treuleich und ungeverlich; und gib des zu urkundt den gegnburtigen/ meinen czeugnusbrief mein hanntgeschrift und under meinem aigen aufgedrukten insigel mir und/ mein erbn an schadn; darunder ich mich Lienhart Hildrer mitsambt meinem insigel verpindt zuge-/ helln und ingedenkh zesein, innhalt des briefs, der gebn ist an erichtag vor sand Andree tag des/ heiligen zwelefpoten anno domini etc. LXXXXVII.