Ich Hanns von Tierna zu den zeiten Huebmaister in Oesterreich Vergich offenleich mit dem brief das fuer mich choemen sint Purchart und Andre geprueder von zuentgraben und habent mit meiner hant und gunst Recht und redleich verchoufft und geben dem erbern mann Jacoben dem Chetnêr purger ze Wienn und seiner hausvrowen Agnesen und ier paider erben, Iren zehent gelegen ze Pêwgen in Plinttendorffer velde auf vier gantzen lehen mynner eins viertails grozzen und chlainen zevelde und ze dorff wie das genant ist der von dem hochgeporn fursten meinem Gnedigen herren Hertzog Albrecht ze Oesterreich ze lehen ist und das in das Hubamt gehoeret und han auch ich an desselben meins herren stat dem vorgenanten Chetner seiner hausvrowen und ier paider erben den vorgenanten zehent verlihen fuerbaz ledichleich und vreileich allen iren frumen damit ze schaffen verchouffen versetzen und geben wem Si wellen als lehens recht ist und des Lanndes recht ze Oesterreich Und darueber so gib ich In den brief zu einem warn uerchunt der sach versigilten mit meinem angehangen insigil und mit Andres insigil des Pog-schuetzen aus der Dornaw der der sach getzeug ist mit Seinem angehangen insigil Im an schaden. Der brief ist geben ze Wienn nach christes gepuert drewtzehen hundert jar darnach in dem vier und achtzgistem jar des nêchsten mitichens vor dem Palmtage.

Source Fulltext: Peter Peusquens