Ich Stephan Seydleins Sun am Hof, und ich Katrey Goeschleins hausfrow, desselben Stephans Swester Wier vergehen fuer uns und fuer all unser Erben, und tuen kunt offenleich mit dem brief, umb das haus gelegen bey Stubentor ze Wienn in der Wollzeil genant in der Gugel, gegen dem haus ueber, daz weilnt Jansen seligen des Phuntymaschen gewesen ist, daz unser vetter Niclas der Poekchl, mit seiner erern hausfrown frown Chuenigunden, den auch Got gnad, mit gesampter hant gechaufft hat und daz die erbêrn weysen her Paul der Holtzchaeuffel zu den zeiten purger-maister, und .. der Rat der Stat ze Wien an unserr stat verchaufft hat, umb Sechtzig phunt wienner phenning, der uns zu unserm tail, von des vorgenanten unsers vetter wegen gevallen sint, dreizzig phunt, der wir gantz und gar verrichtet und bezalt sein, wand wier mit dem egenanten Niclasen dem Poekchlein Geswistreyd chind sein gewesen, als ich egenanter Stephan das von meinen wegen, mit erber chuntschaft beweist han, als es zu einer gedêchtnuezz in der vorge-nanten Stat Puech geschriben stet. Und darumb so sagen wir, den egenanten .. Purgermaister und .. den Rat der Stat ze Wienn, der vorgenanten dreizzig phunt phenning, gantz und gar ledig und los vor aller ansprach, und suellen und wellen auch wir, auf das egenant haus, noch hintz allen den, die es innhabent und besitzent, von desselben hauses wegen, nymmermer chain ansprach noch vodrung haben noch gewynnen in dhainen wegen Und wand wier selber aigen insigil nicht haben, darueber so geben wier In den brief zu einem warn offen urkuend der Sach versigilten mit der zwair erbêrn mannen insigiln hern Thomans des Swêmbels und Wernharts des Sleyher baid purger ze Wienn, die wier des fleizzichleich gepeten haben, daz Si der Sach gezewgen sint, mit iern anhangunden insigiln. Daruender wier uns verpinden mit unsern trewn an gevêr, alles das stêtzehaben und ze laisten, daz vor an dem brief geschriben stet, der geben ist ze Wienn, nach Kristi gepuert, drewzehenhundert jar, dar nach in dem vier und achtzgistem jar, des nêchsten Phintztags nach sant Margreten tag der heiligen Junchfrown.

Source Fulltext: Peter Peusquens