ICH Symeon zu den zêiten oebrister kapplan der kappellen sand Peter gelegen an dem Marcht den man nennet sand Peters freythof ze Wienn Vergich fuer mich und fuer alle mein Nachkomen, kapplen und verweser derselben kappellen, und tuen kunt offennleich mit dem brief, daz mier die erbern weisen .. der Purgermaister, und .. der Rat, der Stat ze Wienn, von iren sundern genaden, und von dhainem Rechten erlawbt habent, die chraemel, die umb die vorgenanten mein kappellen ligent, ynnetzehaben zeniezzen und zenuetzen, uentz auf ein widerrueffen an geverde. Und wannd ich obgenanter Symeon selber nicht aygens Insigels hab, darueber so gib ich fuer mich, und fuer alle mein Nachkomen, den vorgenanten .. dem Purgermaister, und : dem Rat der vorgenanten Stat ze Wienn, und iren Nachkomen den brief zu einem warn uerchunde, der sach versigelten, mit des Erenwuerdigen herren Insigel hern Petreins zu den zeiten ausrichter und verweser in Geistleichen sachen, des Hochwirdigen fürsten, Byschof Johannsen, in dem Pyschtum ze Passaw, und mit des erbern manns Insigel, Fridreichs des Walichs, Purger ze Wienn, dye ich des gepeten hab daz Si, der sach getzeugen sind mit iren anhanngunden Insigelln, darunder ich mich verpind, mit meinen trewen, an geverde, alles das stetzehaben, das vor an dem brief geschriben stet der geben ist ze Wienn, Nach Kristes gepuert drewtzehenhundert jar, darnach in dem funf und achtzigistem jar, des Mittichens in den Phingstfeyrtagen.

Source Fulltext: Peter Peusquens; siehe auch: Camesina in Mitth. des Alterthumsvereines 12, 11 no 7