ICH Margret maister Niclas hausvrow des Fuechsleins zu den zeiten des hochgeporn fuersten, herzog Lewppolts ze Oesterreich etc. Obrister Choch, vergich und tun kunt, allen den, die den brief lesent, oder horent lesen, die nu lebent und hernach chunftig sint, Das ich mit gutem willen mit wolbedachtem muet, zu der zeit, do ich es zerecht wol getuen mocht Recht und redleich geschaft han dem vorgenanten meinem wiert maister Niclasen dem Fuechslein mein Haws gelegen in der Chêrnerstrazz ze wienn zenechst der geistleichen Herren haus datz sand Marienzell Mit der beschaidenheit, ist das ich mit dem selben meinem wiert chind gewinne, darauf soll denne nach unser paider tod das vorgenant Haws Erben und gevallen Wêr aber das ich egenante Margret abging mit dem tod ee denne der vorgenant maister Niclas mein wiert, und das wir miteinander nicht kynd gewunnen oder ob wir Chind miteinander gewunnen und das deu ouch abgingen ee denn derselb mein wiert So sol er denne furbas das vorgenanten Haws ledichleich und freileich haben und allen seinen frumen damit schaffen verchouffen versetzen schaffen machen und geben wem er well, und alles das, damit tuen und wandeln das Im allerpest fugt oder wol gevellet, an allen chrieg und iersal. Ging aber derselb mein wiert ab mit dem tod, ee denn ich So ist mir denne dasselb Haws slechtleich wider ledig worden allen meinen frumen damit ze schaffen an allen chrieg. Und, wand ich obgenante Margret selber aigen insigil nicht han, daruber so gib ich dem oftgenanten meinem wiert, den brief zu einem waren uerchunt der sach versigilten mit der zwayr erbern mann insigiln hern Thomans des Swembleyns und hern Ulreichs des Roezzleins, paid purger ze wienn, die ich des vleizzichleich gepeten han, das Si des geschefts und der sache getzeugen sint mit iren paiden anhangundn insigil In an schaden. Der brief ist geben ze wienn nach Kristes gepuerd, drewtzehenhundert iar, darnach in dem fuenf und Achtzgistem iar an sand Johanns abent ze Sunnbenten.

Source Fulltext: Peter Peusquens