Wir Albrecht von gotes gnaden, Hertzog ze Oesterreich ze Steyr ze Kernden und ze Krain graf ze Tyrol etc. Bekennen offenlich mit dem brief daz fur uns kam, unser getrewr, Ruedel von Lantzen-dorff, und pat uns, daz wir im verleihen geruochten, den hof ze Lantzendorf mit aller seiner zuogehoerunge, der vormals von dem Schoennberger selig, und nu von uns, sein lehen wêre, von des hauses wegen ze Schoennberg, das newlich an uns koemen ist. Das haben wir getan, und haben dem egenanten Ruedlein von Lantzendorff und seinen erben, den obgenanten hof mit aller seiner zuogehoerunge, von newen dingen verlihen, und leihen auch mit dem brief, was wir In zu Recht daran leihen sullen oder muegen, von uns und unsern erben, innezehaben und zu niessen, in lehens Rechten als lehens und landes Recht ist, ungeverleich. Mit urkund ditz brief. Geben ze Wienn an Suntag, nach sand Michels tag. Nach Kristes gepurd drewtzehen hundert Jar, darnach in dem acht und achtzgistem Jare. dd (dominus dux)

Source Fulltext: Peter Peusquens