Ich Hainreich der Huetstokch und ich Kathrey sein hawsfrow Wir vergehen offenleich mit dem brief, das wir mit guetem willen mit verdachtem muet und mit gesampter hannt zu der zeit do wir es wol getun mochten, Recht und redleich geschaft haben, unser ygleichs dem anndern alles das guet das wir zu einander pracht haben, und das wir miteinander mit gesampter hannt erarbait und gechowft haben oder noch furbas miteinander mit gesampter hannt erarbaitten und chowffen werden oder das uns an erstarben wêr oder noch furbas anersturb oder wie das in unser gewalt chomen wêr oder noch furbas chom erbguet und varundguet, wie das genannt oder wo oder an swew das gelegen ist, alles in beslozzen und nichts ausgenomen. Also mit ausgenomen worten, belichs under uns paiden das ander uberlebt, das sol das vorgenant guet alles, wie das genannt ist als vorgeschriben stet furbas ledichleich und freileich haben, und allen seinen frumen damit schaffen verchowffen versetzen schaffen machen, und geben wem es welle und alles das damit tun und wanndelen, das im allerpest fuegt oder wol gevellent, an allen chrieg und ierrsal, und sullen noch muegen es des anndern gemecht das abgangen ist mit dem tod erben noch frewnt daran nicht hindern noch ierren in dehain weg Und darueber so geben wir obgenanten ich Hainreich der Huetstokch und ich Kathrey sein hawsfrow unser ygleichs dem anndern den brief ze einem warn urchund der sach versigelten mit der zwaier erbern mann Insigeln, hern Niclas des Stainer purger ze Wienn, und hern Chunrats des Rokken die zeit des Rats daselbs die wir paidew mit gesampter hannt des vleizzichleich gepeten haben das Si des geschêfts und der sach getzewgen sind mit iren angehangen Insigeln in an schaden. Der brief ist geben ze Wienn nach Kristi gepuerd drewzehenhundert iar darnach in dem newn und achzigistem iar des negsten phinztags nach sand Ulreichs tage.

Source Fulltext: Peter Peusquens